- ओएसडी राजबीर घुमन सं जुड़ल अछि मामिला
चंडीगढ़, एजेंसी
चंडीगढ़ मे सीबीआई पैघ कारबाइ करैत पंजाबक मुख्यमंत्री भगवंत मानक ओएसडी राजबीर सिंह घुमन सं जुड़ल मामिला मे छापेमारी कएलक। सीबीआईक टीम सेक्टर-2 स्थित मकान संख्या 50 पर पहुंचि तलाशी शुरू कएलक। बताओल जा रहल अछि जे ई मकान मुख्यमंत्रीक कैंप कार्यालय सेहो अछि। हालांकि, छापेमारीक दौरान कोन-कोन दस्तावेज अथवा दोसर सामान भेटल, तकर जानकारी अखन धरि सामने नहि आयल अछि। एजेंसी सेहो एहि कारबाइक संबंध मे आधिकारिक जानकारी नहि देने अछि।
घटनाक जानकारी भेटलाक बाद मुख्यमंत्री भगवंत मान सोशल मीडिया एक्स पर पोस्ट करैत कहलनि जे हुनकर कैंप कार्यालय पर सीबीआईक छापेमारी भेल अछि। मान आरोप लगौलनि जे पंजाब सरकार आ हुनका बदनाम करबाक लेल राज्य मे ईडी आ सीबीआईक दुरुपयोग कएल जा सकैत अछि। हुनकर कहब छल जे एहि तरहक कारबाइक उद्देश्य पंजाब सरकारक छवि खराब करब अछि।
दरअसल, पंजाब आ हरियाणा उच्च न्यायालय 5 अक्टूबर 2026 कें राजबीर सिंह घुमन सं जुड़ल मामिला मे सीबीआई जांचक आदेश देने छल। एहि आदेशक बाद सीबीआई छापेमारी कएलक। मामिलाक जड़ि ईडीक जांच मे अछि। ईडी एकटा हाउसिंग सोसाइटी आ जमीनक उपयोगक अनुमति अर्थात चेंज ऑफ लैंड यूज (सीएलयू) सं जुड़ल कथित आर्थिक गड़बड़ीक जांच करैत छल। जांचक क्रम मे राजबीर सिंह घुमन आ हुनकर किछु सहयोगीक नाम सामने आयल। एकर बाद ईडी पंजाब पुलिसक डीजीपी कें तीनटा पत्र पठा घुमन आ हुनकर सहयोगीक विरुद्ध कारबाइक मांग कएलक।
ईडीक आरोपक अनुसार, मामिला मे सरकारी अधिकारीक तबादला आ पदस्थापन प्रभावित करबाक प्रयास, सीएलयू आ दोसर सरकारी काज मे कथित रूप सं पाइक लेन-देन, सरकारी गोपनीय दस्तावेज धरि पहुंच आ बिचौलियाक माध्यम सं लोक कें सरकारी लाभ पहुंचेबा सन गंभीर बात सामने आयल अछि।
ट्रांसफर-पोस्टिंग सं टेंडर धरि: ईडीक अनुसार, जांच मे भेटल चैट आ दोसर सामग्री मे अधिकारीक पदस्थापन, तबादला आ सरकारी पदपर नियुक्ति सं जुड़ल बात उल्लेख अछि। मार्कफेडक टेंडर, लाइसेंस आ दोसर सरकारी मंजूरी कें प्रभावित करबाक आरोप सेहो अछि। एजेंसी भ्रष्टाचार निवारण कानूनक अतिरिक्त आपराधिक षडयंत्र, धोखाधड़ी आ जालसाजी सं जुड़ल धारा मे अपराध बनबाक बात कहलनि अछि।
ईडीक तलाशी मे भेटल छल नकदी आ डिजिटल सामग्री
ईडी मई 2026 मे नितिन गोहल, अजय सहगल आ दोसर लोक सं जुड़ल ठिकानापर तलाशी लेने छल। एजेंसीक अनुसार, एहि दौरान दस्तावेज आ डिजिटल सामग्री भेटल, जखन कि करीब एक करोड़ रुपैया नकद बरामद होबाक दाबी कएल गेल। मोबाइल फोन सं भेटल वॉट्सऐप चैट आ कॉल रिकॉर्ड कें सेहो जांच मे शामिल कएल गेल अछि।
