- अभ्यर्थीक अत्यधिक भीड़क कारण निर्णय, बाद मे देल जायत अगिला सूचना
मधुबनी, समदिया
केंद्रीय विद्यालय, मधुबनी आ केंद्रीय विद्यालय, झंझारपुर मे संविदा शिक्षकक नियुक्ति लेल 25 अगस्त 2026 कें जवाहर नवोदय विद्यालय, मधुबनी मे आयोजित होयवला वॉक-इन साक्षात्कार कें अभ्यर्थीक अत्यधिक भीड़क कारण अगिला आदेश धरि स्थगित कए देल गेल अछि। विदित हो जे नवसृजित केंद्रीय विद्यालय, मधुबनी आ झंझारपुर मे बालवाटिका-1 सं वर्ग 5 धरि कक्षा संचालित होयत। एहि लेल दुनू विद्यालय मे बालवाटिका शिक्षक, प्राथमिक शिक्षक, कंप्यूटर अनुदेशक आ संगीत प्रशिक्षकक वॉक-इन साक्षात्कार आयोजित कएल जेबाक छल।
केंद्रीय विद्यालय, मधुबनी मे बालवाटिका शिक्षकक 6, प्राथमिक शिक्षकक 6, कंप्यूटर अनुदेशकक 1 आ संगीत प्रशिक्षकक 1 पद रिक्त अछि। एहि प्रकारे केंद्रीय विद्यालय, झंझारपुर मे सेहो समान पद पर संविदा नियुक्ति कएल जायत। ई सभ पद पूर्णतः संविदा आधारित अछि आ एकर नियमित रिक्ति सं कोनो संबंध नहि अछि। केंद्रीय विद्यालय संगठन द्वारा नियमित कर्मचारीक पदस्थापन कएल गेलाक बाद संविदा आधारित नियुक्ति स्वतः समाप्त भए जायत।
वर्तमान मे संविदा पर काज कएनिहार शिक्षक आ अन्य कर्मी कें केंद्रीय विद्यालय संगठनक दिस सं प्रतिमाह 21,200 टाका देल जाइत अछि। संविदा नियुक्ति लेल अगिला वॉक-इन साक्षात्कारक तिथि आ अन्य जानकारी उचित माध्यम सं बाद मे देल जायत।
