- आपदा प्रबंधन प्राधिकरणक बनाओल गेला उपाध्यक्ष
पटना, समदिया
बिहार सरकार वरिष्ठ आइएएस अधिकारी दीपक कुमारक जिम्मेवारी मे बदलाव केलक अछि। हुनका मुख्यमंत्रीक प्रधान सचिव पद सं हटा कए बिहार राज्य आपदा प्रबंधन प्राधिकरणक उपाध्यक्ष नियुक्त कएल गेल अछि। 1984 बैचक बिहार कैडरक दीपक कुमार बिहारक मुख्य सचिव सेहो रहि चुकल छथि। ओ तत्कालीन मुख्यमंत्री नीतीश कुमारक प्रधान सचिवक रूप मे सेहो दीर्घ समय धरि काज केने छथि।
दीपक कुमार 20 मार्च 2021 कें सरकारी सेवा सं सेवानिवृत्त भेल छलाह आ ओकर अगिला दिन 21 मार्च कें हुनका मुख्यमंत्रीक प्रधान सचिवक जिम्मेवारी देल गेल छल। एहि पद पर ओ करीब साढ़े पांच वर्ष धरि रहलाह। आब हुनका आपदा प्रबंधन प्राधिकरण मे नव जिम्मेवारी देल गेल अछि।
दीपक कुमार अपन प्रशासनिक सेवाक दौरान बिहारक 13 जिला मे जिलाधिकारीक रूप मे काज कए चुकल छथि। ओ विकास आयुक्तक पद सेहो सम्हारि चुकल छथि। केंद्र मे सेहो ओ भारतीय राष्ट्रीय राजमार्ग प्राधिकरणक अध्यक्ष आ कर्मचारी राज्य बीमा निगमक महानिदेशकक जिम्मेवारी सम्हारने छथि।
आपदा प्रबंधन प्राधिकरणक उपाध्यक्षक पद एहि मास 11 सितंबर सं रिक्त छल। एहि सं पहिने उदय कांत मिश्रा एहि पद पर छलाह। दीपक कुमारक सीएमओ सं विदाइ प्रशासनिक स्तर पर महत्वपूर्ण फेरबदल मानल जा रहल अछि। मुख्यमंत्री कार्यालयक उपलब्ध आधिकारिक निर्देशिका मे हाल धरि हुनकर नाम प्रधान सचिवक रूप मे देखाइ पड़ैत छल, जखन कि नव नियुक्तिक खबरि आबि गेल अछि।
