श्रीलंकाक विरुद्ध सिंहलीज स्पोर्ट्स क्लब मे जारी दोसर टेस्ट मैचक दोसर दिन भारत अपन पकड़ मजबूत कए लेने अछि। बरखा सं प्रभावित मोकाबला मे भारतीय टीम 503 रन पर 9 विकेटक स्कोर पर अपन पहिल पारी घोषित कएलक आ दिनक खेल समाप्त होय धरि श्रीलंकाक 2 विकेट सेहो झटका देलक।
रविवारक टॉस जीतिकए बल्लेबाजी करए उतरल भारतीय टीम अपन पहिल पारी 503 रन पर 9 विकेटक स्कोर पर घोषित कएलक। भारत 66 रनक स्कोर धरि केएल राहुल आ यशस्वी जायसवालक रूप मे दुनू सलामी बल्लेबाजक विकेट गंवा देने छल। केएल राहुल 33 गेंद मे 18 रन बना कए आउट भेलाह, जखनकि जायसवाल 9 चौकाक मदति सं 45 रनक पारी खेललनि।
एहि ठाम सं देवदत्त पडिक्कल मोर्चा संभारलनि। ओ कप्तान शुभमन गिलक संग तेसर विकेट लेल 120 रनक साझेदारी कएलनि। गिल 50 रन बनौलनि। हुनकर पारी मे 6 चौका शामिल छल।
पंत पांचम नंबर पर बल्लेबाजी लेल उतरलाह। ओ 15 गेंदक सामना मात्र केने छलाह, तखने कलाई मे चोटक कारण पहिल दिन मैदान सं वापस लौटए पड़ल छल। एकरा बाद रवींद्र जडेजा 43 रन बनबैत पडिक्कलक संग 74 रनक साझेदारी कए टीम कें मजबूत स्थिति मे पहुंचौलनि। पडिक्कल 12 चौकाक मदति सं 117 रन बना कए आउट भेलाह।
मोकाबलाक दोसर दिन सोमदिन बरखाक कारण खेल बेर-बेर रोकल गेल। एहि बीच पंत एक बेर फेर बल्लेबाजी लेल उतरलाह आ ध्रुव जुरेलक संग 112 रनक साझेदारी कएलनि। पंत 8 चौकाक मदति सं 63 रन बनाकए आउट भेलाह, जखनकि जुरेल 11 चौकाक संग 115 रनक नाबाद पारी खेललनि।
श्रीलंकाक दिस सं असिथा फर्नांडो सब सं बेसी 4 विकेट हासिल कएलनि, जखनकि प्रभात जयसूर्या आ केशरा नुवानथा 2-2 विकेट लेलनि। एकर अतिरिक्त लाहिरु कुमारा 1 विकेट झटकलनि।
दिनक खेल समाप्त होय धरि श्रीलंकाक टीम अपन पहिल पारी मे 3 ओवरक सामना कए 2 विकेटक नोकसान पर मात्र 8 रन बना सकल। प्रसिद्ध कृष्णा लाहिरु उडारा कें 1 रन पर आउट कएलनि, जखनकि मानव सुथार प्रभात जयसूर्या कें 2 रन पर पवेलियन पठौलनि। एखन श्रीलंकाक टीम भारत सं 495 रन पाछू अछि।
भारतीय टीम पहिल टेस्ट मैच 165 रन सं जीतने छल। एहि जीतक बाद सीरीजक ई आखरी मोकाबला निर्णायक भए गेल अछि।
