दरभंगा, समदिया
भाजपाक प्रदेश अध्यक्ष सह दरभंगा नगर विधायक संजय सरावगी मंगलदिन दरभंगा सदरक राजकीय मध्य विद्यालय रानीपुर आ मॉडल प्लस-2 जनता उच्च विद्यालय जीवछघाट मे आयोजित सहयोग-सह-सेवा सेतु शिविर मे भाग लेलनि। एहि अवसर पर ओ कहलनि जे सरकारक उद्देश्य आम लोकक समस्याक त्वरित आ समयबद्ध समाधान सुनिश्चित करब अछि। 6, 7 आ 8 अक्तूबरके सभ प्रखंड मे आयोजित सेवा सेतु शिविर मे लोक अपन समस्या लए आवेदन दए सकैत छथि।
संजय सरावगी कहलनि जे ऑनलाइन आवेदन करबा मे परेशानी होइत हो तं लोक लिखित आवेदन दथि। अधिकारी सभ एहि आवेदनके 24 घंटाक भीतर सीएम पोर्टल पर अपलोड करताह आ 30 दिनक भीतर ओकर निष्पादन सुनिश्चित कएल जाएत। समाधान सं संतुष्ट नहि भेलाक स्थिति मे आवेदक सीएम पोर्टल पर फेर शिकायत दर्ज करा सकैत छथि, जाहि पर मुख्यमंत्री स्तर सं समीक्षा कएल जाएत।
ओ कहलनि जे शिक्षा क्षेत्र मे सेहो व्यापक बदलाव भेल अछि। प्रत्येक पंचायत मे प्लस-2 विद्यालय आ सभ प्रखंड मे डिग्री कॉलेजक सुविधा उपलब्ध कराओल गेल अछि। उच्चतर शिक्षण संस्थान मे नामांकनक संख्या 2005 मे लगभग 3.70 लाख छल, जे आब बढ़ि कए करीब 27 लाख भए गेल अछि। सरकारी विद्यालयक विद्यार्थीसभके डिजिटल माध्यम सं 24 घंटा शैक्षणिक सहायता उपलब्ध कराओल जा रहल अछि।
सरावगी कस्तूरबा गांधी विद्यालयक स्थिति के सेहो जायजा लेलनि आ बीडीओके कायाकल्प योजनाक अंतर्गत मरम्मत लेल एस्टिमेट पठेबाक निर्देश देलनि। ओ पात्र लोक सभ सं राशन कार्ड लेल आवेदन करबाक आ जनप्रतिनिधि सभ सं लोकक समस्या पोर्टल पर दर्ज कराबय मे सहयोग करबाक अपील केलनि।
