- निर्वाचन आयोग दिस बढ़ि रहल विपक्षी सांसदक मार्च कें आकाशवाणी लग रोकल गेल
-
आकाशवाणीक समीप एक वृक्षक नीचा चटाइ बिछा कए धरना शुरू केलनि राहुल आ प्रियंका
नई दिल्ली, समदिया
मुख्य चुनाव आयुक्त ज्ञानेश कुमार आ विशेष गहन पुनरीक्षण (एसआईआर)क विरोध मे विपक्षी दलक प्रदर्शन मंगलदिन राजधानी दिल्ली मे सेहो जारी रहल। चुनाव आयोगक मुख्यालय निर्वाचन सदन धरि जयबाक विपक्षी सांसदक मार्च पुलिस द्वारा रोकि देल गेलाक बाद लोकसभा मे नेता प्रतिपक्ष राहुल गांधी आ कांग्रेस सांसद प्रियंका गांधी वाड्रा सांझ धरि आकाशवाणी भवन परिसर मे धरना पर बैसल रहलाह।
विपक्षी सांसदक मार्च कें निर्वाचन आयोग दिस बढ़ैत काल पुलिस आकाशवाणी भवन परिसर मे रोकि देलक। पुलिस द्वारा राहुल गांधी आ प्रियंका गांधी वाड्रा सहित अन्य विपक्षी नेता सभ कें ओतय सं हटबाक लेल कहल गेल। मुदा दुनू नेता अपन स्थान पर डटल रहलाह आ धरना जारी रखलनि। विपक्षक ई प्रदर्शन मुख्य चुनाव आयुक्त ज्ञानेश कुमारक इस्तीफाक मांग आ एसआईआरक विरोध मे कएल जा रहल अछि।
चुनाव आयोग जयबाक छल कार्यक्रम
एहि सं पहिने राहुल गांधी आ प्रियंका गांधी वाड्रा सहित विपक्षी नेता निर्वाचन आयोगक मुख्यालय पहुंचबाक लेल आकाशवाणी भवन परिसर मे प्रवेश कएलनि। विपक्षी सांसद सभक योजना छल जे ओ सभ सामूहिक रूप सं निर्वाचन सदन पहुंचि मुख्य चुनाव आयुक्त ज्ञानेश कुमार सं भेंट करथि आ एसआईआर सहित चुनावी प्रक्रिया सं जुड़ल अपन आपत्ति आ प्रश्न हुनका समक्ष रखथि। मुदा पुलिस मार्च कें आगू बढ़य सं रोकि देलक। पुलिसक रोकक बादो राहुल गांधी आ प्रियंका गांधी वाड्रा आकाशवाणी भवन परिसर धरि पहुंचला। एहि ठाम दुनू नेता धरना पर बैसि गेलाह। प्रदर्शन मे विपक्षी दलक अन्य नेता आ सांसद सेहो उपस्थित रहलाह।
विपक्षी नेता सभक आरोप अछि जे एसआईआरक माध्यम सं मतदाता सूची मे व्यापक स्तर पर बदलावक आशंका उत्पन्न भेल अछि। ओ सभ निर्वाचन प्रक्रियाक पारदर्शिता आ निष्पक्षता पर सवाल उठबैत मुख्य चुनाव आयुक्तक इस्तीफाक मांग कए रहल छथि।
राहुल गांधी कहलनि, ककरो नहि छोड़ल जायत
राहुल गांधी सोशल मीडिया पर जारी अपन बयान मे केंद्र सरकार, भाजपा आ निर्वाचन आयोग पर गंभीर आरोप लगौलनि। ओ कहलनि जे देशक संग जे कएल गेल अछि, से देशद्रोह अछि। चाहे प्रधानमंत्री मोदी होथि, अमित शाह होथि, आरएसएस प्रमुख होथि अथवा ज्ञानेश कुमार, ककरो नहि छोड़ल जाएत। राहुल गांधीक एहि बयानक बाद विपक्षी प्रदर्शन मे राजनीतिक आरोप-प्रत्यारोप बेसी तीव्र भए गेल। कांग्रेसक संग विपक्षी गठबंधनक नेता सभक कहब अछि जे निर्वाचन प्रक्रिया पर उठि रहल प्रश्नक जवाब चुनाव आयोग आ सरकार कें देबाक चाही। आकाशवाणी भवन परिसर मे धरना देल गेलाक कारण दिल्लीक एहि महत्वपूर्ण क्षेत्र मे राजनीतिक गतिविधि बढ़ि गेल। पुलिसक दिस सं सुरक्षा व्यवस्था कड़ा राखल गेल। विपक्षी नेता सभ स्पष्ट कएलनि जे मांग पूरा नहि भेल धरि ओ सभ अपन विरोध जारी रखताह।
एहि बीच मुख्य चुनाव आयुक्त ज्ञानेश कुमारक इस्तीफाक मांग, एसआईआरक विरोध आ निर्वाचन प्रक्रियाक पारदर्शिता कें लए विपक्ष आ सत्तापक्ष बीच राजनीतिक बहस आगू आरो तेज होबाक संभावना अछि।
भ्रम पसारि रहल छथि राहुल : संबित पात्रा
इंडिया ब्लॉकक मार्च आ राहुल गांधी द्वारा लगाओल आरोप पर भाजपाक दिस सं पलटवार कएल गेल अछि। भाजपा प्रवक्ता संबित पात्रा कहलनि जे ई मार्च कांग्रेस आ ओकर सहयोगी दलक अराजकता उत्पन्न करबाक आ राहुल गांधी कें फेर लॉन्च करबाक एकटा आरो प्रयास अछि। पात्रा राहुल गांधी पर सुप्रीम कोर्टक टिप्पणी कें गलत रूप मे प्रस्तुत करबाक आरोप लगौलनि। ओ कहलनि जे सर्वोच्च न्यायालय फॉर्म-6 कें अवैध नहि ठहरौने अछि, बल्कि एहि मामिला मे नोटिस जारी कए आगू जांचक बात कहल गेल अछि। ओ आरोप लगौलनि जे एसआईआरक विरोध कए कांग्रेस देश मे भ्रम उत्पन्न कए रहल अछि। भाजपा सांसद सुधांशु त्रिवेदी सेहो राहुल गांधी पर एसआईआर कें लए भ्रामक, बेबुनियाद आ असंगत बात कहबाक आरोप लगौलनि। ओ सवाल कएलनि जे मृतक, स्थान बदलि चुकल आ डुप्लीकेट मतदाताक बिना जांच मतदान अधिकार कायम राखि कांग्रेस ककरा लाभ पहुंचाबय चाहैत अछि।
