श्रद्धालु आ कार्यकर्ता सभके सांसद देलनि स्वच्छताक संदेश
दरभंगा। सेवा संकल्प महाअभियानक अंतर्गत भाजपाक दिस सं चलाओल जा रहल सेवा पखवाड़ाक अंतर्गत जिला गंगा समितिक दिस सं बुधवारक सांझ शुभंकरपुर स्थित बागमती तट पर रामधनी घाट मे भव्य गंगा आरतीक आयोजन कएल गेल। कुशेश्वरस्थान सं आएल विद्वान पुरोहित सभ विधिवत गंगा आरती संपन्न करौलनि।
स्थानीय सांसद डॉ. गोपाल जी ठाकुर दीप प्रज्वलित कए कार्यक्रमक उद्घाटन कएलनि। एहि अवसर पर राज्यसभा सांसद डॉ. धर्मशिला गुप्ता, पूर्व विधायक अमरनाथ गामी, नमामि गंगे परियोजनाक निदेशक फारुख, भाजपा जिला महामंत्री सुजीत मल्लिक, जिला मंत्री बालेंदु झा बालाजी सहित कतेको जनप्रतिनिधि आ श्रद्धालु उपस्थित छलाह। कार्यक्रमक संचालन बालेंदु झा कएलनि।
उपस्थित जनप्रतिनिधि सभके पाग आ अंगवस्त्र प्रदान कए सम्मानित कएल गेल। गंगा आरतीक बाद सांसद डॉ. गोपाल जी ठाकुर श्रद्धालु आ एनडीए कार्यकर्ता सभके गंगा स्वच्छता आ जल संरक्षणक संकल्प दियौलनि। ओ कहलनि जे पर्यावरण संरक्षण प्रत्येक जिम्मेदार नागरिकक कर्तव्य अछि।
हुनक अनुसार, प्रधानमंत्री नरेंद्र मोदीक नेतृत्व मे पर्यावरण संरक्षण आ ग्लोबल वार्मिंगक चुनौती सं निपटबाक लेल विभिन्न पहल कएल जा रहल अछि। सांसद कहलनि जे सनातन संस्कृति मे गंगा आरतीक विशेष आध्यात्मिक आ धार्मिक महत्व अछि।
एहि आयोजनक माध्यम सं प्रधानमंत्री नरेंद्र मोदीक सार्वजनिक जीवनक 25 बरख पूरा भेलाक अवसर पर हुनक दीर्घायु लेल सेहो कामना कएल गेल। समारोह मे पैघ संख्या मे श्रद्धालु आ भाजपा कार्यकर्ता सहभागी भेलाह।
बागमती तट पर आयोजित एहि कार्यक्रमक माध्यम सं जलक स्वच्छता, संरक्षण आ पर्यावरणक प्रति लोक सभके अपन दायित्वक बोध कराओल गेल।
