मधुबनी, समदिया
बिहार राज्य खेल प्राधिकरण, पटना, खेल विभाग आ जिला प्रशासन, मधुबनीक संयुक्त तत्वावधान मे आयोजित मधुबनी जिला स्तरीय विद्यालय खेलकूद प्रतियोगिता-2026 केर भव्य शुभारंभ मंगलदिन पंडौल उच्च विद्यालयक प्रांगण मे भेल। प्रतियोगिताक उद्घाटन उप विकास आयुक्त, मधुबनी, जिला कला, संस्कृति सह खेल पदाधिकारी, आर.एन. कॉलेज पंडौल केर खेल प्रभारी सरिता कुमारी आ राष्ट्रीय पुरस्कार सं सम्मानित शिक्षिका मीनाक्षी कुमारी द्वारा दीप प्रज्वलित कए कएल गेल।
उद्घाटन समारोहक आरंभ मे जिला खेल पदाधिकारी नीतीश कुमार उपस्थित अतिथि, खेल पदाधिकारी, शिक्षक, प्रशिक्षक आ विभिन्न विद्यालय सं आएल खिलाड़ीसभक स्वागत कएलनि। ओ कहलनि जे विद्यालय स्तर पर आयोजित खेल प्रतियोगिता बच्चासभक खेल प्रतिभा कें चिन्हित करबाक आ ओकरा आगू बढ़ेबाक महत्वपूर्ण माध्यम अछि। जिलाक विभिन्न विद्यालय सं पैघ संख्या मे खेलाड़ीक सहभागिता सं स्पष्ट अछि जे मधुबनी मे खेल प्रतिभाक कोनो कमी नहि अछि। ओ सभ प्रतिभागी कें अनुशासन आ खेल भावना सं प्रतियोगिता मे भाग लेबाक आ अपन प्रतिभाक नीक प्रदर्शन करबाक लेल प्रेरित कएलनि।
उप विकास आयुक्त कहलनि जे बच्चा सभ मे खेलक प्रति रुचि, अनुशासन आ प्रतिस्पर्धाक भावना विद्यालय स्तर सं विकसित करबाक आवश्यकता अछि। लक्ष्य जिला वा राज्य स्तर धरि सीमित नहि रहि एशियाई खेल आ ओलंपिक मे देशक प्रतिनिधित्व करब होयबाक चाही। खेल सं शारीरिक आ मानसिक विकासक संग आत्मविश्वास, नेतृत्व क्षमता आ टीम भावना सेहो विकसित होइत अछि।
जिला खेल पदाधिकारीक अनुसार प्रतियोगिता 1 सं 3 अक्टूबर धरि विभिन्न खेल मैदान, खेल भवन, नगर भवन, राजनगर प्लस टू उच्च विद्यालय आ माउंट कार्मेल विद्यालय, जयनगर सहित विभिन्न स्थल पर आयोजित भए रहल अछि। एहि मे 100 सं बेसी सरकारी आ निजी विद्यालयक करीब 3 हजार खेलाड़ी अंडर-14, अंडर-17 आ अंडर-19 आयु वर्ग मे कुल 15 खेल विधा मे सहभागी भए रहल छथि।
उत्कृष्ट प्रदर्शन कएनिहार चयनित खेलाड़ी दरभंगा मे आयोजित प्रमंडल स्तरीय प्रतियोगिता मे मधुबनीक प्रतिनिधित्व करताह। कार्यक्रमक अंत मे गुब्बारा उड़ाओल गेल आ हरियर झंडी देखाकए प्रतियोगिताक विधिवत शुभारंभ कएल गेल।
