- मनोज यादव कहलनि जे मोदी सरकारक आर्थिक नीति सं देश तबाहीक कगार पर
-
किसानक ऋण माफ करबाक मांग
-
बीवीजी रामजी संशोधन विधेयक कें तत्काल वापस लेबाक मांग
-
बीज विधेयक वापस लेबाक आ किसानक ऋण माफ करबाक मांग
मधुबनी, समदिया
भारतक कम्युनिस्ट पार्टी (मार्क्सवादी)क राष्ट्रव्यापी आह्वान पर ट्रेड यूनियन द्वारा जोरदार प्रतिरोध मार्च आ जेल भरो अभियान चलाओल गेल। टाउन क्लब मैदान सं निकलल जुलूस शहरक थाना चौक होइत जिला समाहरणालय पहुंचल। एहि दौरान यातायात व्यवस्था अस्त-व्यस्त रहल। कार्यकर्ता सभ अपन मांगक समर्थन मे जोरदार नारेबाजी करैत रहलाह। बाद मे जुलूस सभा मे परिणत भए गेल।
सभा समाप्त भेलाक बाद जनसंगठनक हजारो कार्यकर्ता आ नेता सभ नगर थाना मे गिरफ्तारी देलनि। नगर थाना निरीक्षक द्वारा प्रदर्शनकारी सभ कें गिरफ्तार कएल गेल। सभाक अध्यक्षता रामजी यादव कयलनि। सभाक संबोधन करैत बिहार राज्य किसान सभाक राज्य संयुक्त सचिव मनोज कुमार याद केंद्र आ राज्य सरकार पर जमि कए हमला कयलनि। ओ कहलनि जे मोदी सरकारक गलत आर्थिक नीतिक कारण देश तबाहीक कगार पर पहुंचि गेल अछि। ओ चारू श्रम संहिता कानून वापस लेबाक, मनरेगा योजना लागू करबाक आ बीवीजी रामजी संशोधन विधेयक कें तत्काल वापस लेबाक मांग पर जोर देलनि। यादव बिजली विधेयक वापस लेबाक, स्मार्ट मीटर लगेनाइ रोकबाक, सभ स्कीम वर्कर कें 26 हजार रुपैया भुगतान करबाक, बीज विधेयक वापस लेबाक आ किसानक ऋण माफ करबाक मांग सेहो रखलनि। एहि संग ओ बिहार सरकारक कार्यशैली पर सवाल उठबैत रिक्त पद सभ पर बहाली करबाक मांग कयलनि। सभाक संबोधन करैत मधुबनी किसान सभाक सचिव सत्यनारायण यादव कहलनि जे मधुबनी मे अपराधीक मनोबल बढ़ि गेल अछि। ओ कहलनि जे रहिका खरौआक किसान नेता भागवत यादवक अपराधी द्वारा बेरहमी सं हत्या कए देल गेल, मुदा प्रशासन अपराधी कें बचाबयक काज कए रहल अछि। दोसर दिस मधुबनीक लोहा पंचायत मे किसान सभ शाखा नहर चालू करबाक लेल आंदोलन करैत छथि तं बेनीपट्टीक अंचल अधिकारीक द्वारा अड़ेर थाना मे 151/26क अंतर्गत झूठा मुकदमा दर्ज कराओल जा रहल अछि। ओ जिला प्रशासन सं मुकदमा वापस लेबाक मांग कयलनि। खेतीहर मजदूर यूनियन, मधुबनीक अध्यक्ष रामनारायण यादव मधुबनी जिला कें सुखाड़ क्षेत्र घोषित करबाक, खेतीहर मजदूर सभ कें रोजगार उपलब्ध कराबय आ ठेका प्रथा बंद करबाक मांग कयलनि। एहि अवसर पर डीवाईएफआई नेता रामनरेश यादव, बिहार राज्य किसान सभाक जिला उपाध्यक्ष दिलीप झा, बाबूलाल महतो, कामगार यूनियनक सचिव उमेश राय, राजेश कुमार मिश्र, शशिभूषण प्रसाद, बिंदु यादव, सोनधारी यादव, विजय नाथ मिश्र, राणा प्रताप सिंह, अशोक यादव, उमेश घोष, रामकृष्ण यादव, विद्यानंद शास्त्री, ललित कुशवाहा, हरिहर झा, अरुण यादव, प्रभात कुमार, कैलाश पासवान, रेखा देवी, सुमित्रा देवी सहित अन्य नेता सभ गिरफ्तारी देलनि।
