- पिछला वर्षक 10 पदकक रेकॉर्ड तोड़ि खेलाड़ी सब स्थापित कयलनि नव कीर्तिमान
सहरसा, समदिया
कैमूर मे बिहार राज्य खेल प्राधिकरण, पटनाक संग संबंधित आयोजकसभक संयुक्त तत्वावधान मे 13 सं 16 अक्टूबर धरि आयोजित राज्यस्तरीय भेद प्रमंडल विद्यालय कुश्ती प्रतियोगिता मे कोशी प्रमंडलक पहलवान सभ शानदार प्रदर्शन करैत कुल 12 पदक जीतलनि। एहि मे स्वर्ण, रजत आ कांस्य पदक शामिल अछि। खेलाड़ीसब पिछला वर्षक 10 पदकक रेकॉर्ड के पछाड़ैत नव कीर्तिमान स्थापित कयलनि।
प्रतियोगिताक दोसर दिन ग्रीकोरोमन अंडर-19 के 83 किलोग्राम भार वर्ग मे प्रणव कुमार स्वर्ण पदक जीतलनि। ओतहि अभिनव कुमार (फ्रीस्टाइल, अंडर-17, 65 किलोग्राम), शिवम राज (ग्रीकोरोमन, अंडर-19, 67 किलोग्राम), देवाशीष सिंह (ग्रीकोरोमन, अंडर-19, 61 किलोग्राम), अमित कुमार (फ्रीस्टाइल, 85 किलोग्राम) आ शिवम कुमार (फ्रीस्टाइल, अंडर-14, 40 किलोग्राम) रजत पदक हासिल कयलनि। एकर अतिरिक्त प्रत्युष कुमार, सोनू कुमार, विभीषण कुमार, पियूष सौरभ, बमबम कुमार आ गणित कुमार अलग-अलग भार वर्ग मे कांस्य पदक जीतलनि। खेलाड़ीसबक एहि उपलब्धि सं जिलाक मान बढ़ल अछि। सहरसा कुश्ती संघक जिला सचिव हरेंद्र सिंह मेजर कहलनि जे ग्रामीण क्षेत्र सभ मे प्रतिभावान पहलवानसभक बढ़ैत संख्या के सकारात्मक परिणाम पदकक रूप मे देखबा लेल भेटि रहल अछि। ओ 13 बेर नेशनल कोच आ 35 बेर बिहार राज्य खेल प्राधिकरणक तकनीकी पदाधिकारी आ रेफरी रहि चुकल छथि। एहि उपलब्धि पर जिला खेल पदाधिकारी कुमारी तोसी सहित जिलाक विभिन्न खेल संघ सभ पदक विजेता खेलाड़ीसब आ हरेंद्र सिंह मेजर के बधाई देलनि।
