भागलपुर, समदिया
बिहार मे गंगा सहित प्रमुख नदी सभक जलस्तर मे शुक्रदिन कतेको स्थान पर उतार-चढ़ाव दर्ज कएल गेल। केंद्रीय बाढ़ि नियंत्रण कक्ष, जल संसाधन विभाग, पटना द्वारा 2 अक्टूबर कें अपराह्न 2 बजे जारी रिपोर्टक अनुसार भागलपुर आ कहलगांव मे गंगाक जलस्तर पछिला 24 घंटा मे बढ़ल अछि। रिपोर्टक अनुसार दुनू स्थानक स्थिति पर निगरानी राखल जा रहल अछि। बिहारक कतेको भाग मे गंगाक जलस्तर लगातार बढ़बाक स्थिति कें देखैत जिला प्रशासन पटना, भागलपुर आ कहलगांवक नदीक कातक इलाका मे सतर्कता बरतबाक निर्देश देलक अछि। भागलपुर मे शुक्रदिन दुपहर गंगाक जलस्तर 33.46 मीटर दर्ज कएल गेल, जखन कि एक दिन पहिने ई 33.19 मीटर छल। एहि तरहें 24 घंटा मे 0.27 मीटर अर्थात् 27 सेंटीमीटरक वृद्धि भेल अछि। एतय गंगाक खतरा स्तर 33.68 मीटर निर्धारित अछि। वर्तमान जलस्तर खतरा निशान सं 0.22 मीटर नीचा अछि। ओही तरहें कहलगांव मे गंगाक जलस्तर 31.63 मीटर दर्ज कएल गेल, जखन कि बृहस्पति कें ई 31.21 मीटर छल। पछिला 24 घंटा मे एतय 0.42 मीटर अर्थात् 42 सेंटीमीटरक बढ़ोतरी भेल अछि। कहलगांव मे गंगाक खतरा स्तर 31.09 मीटर अछि। रिपोर्टक आंकड़ा अनुसार एतय नदीक जलस्तर खतरा निशान सं 0.54 मीटर ऊपर पहुंचि गेल अछि। केंद्रीय बाढ़ि नियंत्रण कक्षक रिपोर्टक मुताबिक भागलपुर आ कहलगांव दुनू ठाम गंगाक जलस्तर मे वृद्धि दर्ज कएल गेल अछि। विशेष रूप सं कहलगांव मे जलस्तर खतरा निशान पार कए गेल होयबाक कारण नदीक कातक इलाका मे निगरानी बढ़ेबाक आवश्यकता अछि। राज्यक दोसर गंगा घाट सभक स्थिति देखल जाय तं मुंगेर मे जलस्तर 39.03 मीटर रहल, जे खतरा निशान सं 0.30 मीटर नीचा अछि। ओतहि हाथीदह मे जलस्तर 42.66 मीटर दर्ज कएल गेल, जे खतरा निशान सं 0.90 मीटर नीचा अछि। दिघाघाट मे गंगाक जलस्तर खतरा निशान सं 0.32 मीटर आ गांधीघाट मे 1.09 मीटर ऊपर दर्ज कएल गेल अछि।
