भारतक 17 वर्षीय उभरैत बैडमिंटन खेलाड़ी तन्वी शर्मा शानदार प्रदर्शन जारी रखैत कोरिया मास्टर्स 2026क महिला एकल वर्गक क्वार्टर फाइनल मे स्थान बना लेलनि।
बृहस्पति कें खेलल गेल दोसर दौरक मोकाबला मे तन्वी अपनहि देशक श्रियांशी वालिशेट्टी कें 21-16, 17-21, 21-13 सं पराजित कएलनि। आब क्वार्टर फाइनल मे हुनकर सामना दोसर भारतीय खेलाड़ी रक्षिता श्री रामराज सं होयत। रक्षिता जापानक मानामी सुइजू कें 22-20, 21-10 सं हराकए आखरी आठ मे स्थान बना लेने छथि।
गत सप्ताह ताइपे ओपन सुपर-300क खिताब जीतिकए इतिहास रचनिहार तन्वी शर्मा एक बेर फेर अपन संघर्षपूर्ण खेलक परिचय देलनि। एहि मास भारत मे होमय बला बीडब्ल्यूएफ विश्व बैडमिंटन चैंपियनशिप सं पहिने लगातार जीत दर्ज कए ओ अपन दावेदारी आरो मजबूत केने छथि।
ऑल इंडिया मोकाबलाक पहिल गेम मे तन्वीक शुरुआत नीक नहि रहल। शुरुआती अंक मे ओ पाछां चलि रहल छलीह। मुदा तेज मूवमेंट आ आक्रामक स्ट्रोकक बल पर शानदार वापसी करैत लगातार महत्वपूर्ण अंक जुटौलनि आ पहिल गेम 21-16 सं अपन नाम कएलनि।
दोसर गेम मे श्रियांशी वालिशेट्टी दमदार वापसी कएलनि। मध्यांतर धरि ओ 11-6क बढ़त बना लेने छलीह आ लगातार आक्रामक खेल देखौलनि। तन्वी बीच मे भेद कम करबाक प्रयास कएलनि, मुदा श्रियांशी संयम बनौने रखैत दोसर गेम 21-17 सं जीतिकए मोकाबला निर्णायक गेम धरि पहुंचा देलनि।
निर्णायक गेम मे तन्वी शुरूआत सं अंत धरि हावी रहलीह। ओ प्रारंभहि सं बढ़त बना लेलनि आ पूरा गेम मे श्रियांशी कें वापसीक कोनो अवसर नहि देलनि। विश्व रैंकिंग मे 30म स्थान पर काबिज तन्वी शानदार नियंत्रणक संग तेसर गेम 21-13 सं जीतिकए क्वार्टर फाइनल मे अपन स्थान पक्का कए लेलनि।
