- 23.92 करोड़क सड़कक नमूना दिल्ली पठाओल जायत
मनीगाछी, समदिया
बेनीपुर सं मनीगाछी प्रखंड मुख्यालय कें जोड़यवला करीब 18.64 किलोमीटर लंबा सड़कक गुणवत्ता जांच शनिदिन केंद्रीय गुणवत्ता एजेंसीक अधिकारी जगदीश गर्ग कयलनि। जांच दल सड़कक खुदाई कए मोटाइ जांचलक आ निर्माण सामग्रीक नमूना एकत्र कयलक। एहि नमूनासभक जांच दिल्ली स्थित प्रयोगशाला मे कयल जायत। 23.92 करोड़ टाकाक लागत सं बनि रहल एहि सड़कक निर्माण जुलाई 2024 मे शुरू भेल छल आ एकरा जनवरी 2026 धरि पूरा करबाक लक्ष्य छल। मुदा, सझुआर मे 760 मीटर, बाजितपुर मे 540 मीटर आ भंडारिसम मे 2200 मीटर सड़कक निर्माण अधूरा रहल बताओल गेल अछि। सड़क पर गिट्टी उखड़बाक आ ढलाईवला हिस्सा खुरदुरा भए जेबाक शिकायत सेहो सामने आयल अछि। सड़कक गुणवत्ता जांच करय लेल मिथिला संघर्ष मोर्चाक अध्यक्ष डॉ. राम मोहन झा राज्य आ केंद्रीय एजेंसी सभ सं अनुरोध केने छलाह। जांच अधिकारी जगदीश गर्ग कहलनि जे प्रयोगशालाक रिपोर्ट अयलाक बादे सड़कक वास्तविक गुणवत्ता स्पष्ट भए सकत। ओम्हर, ग्रामीण कार्य विभाग (आरडब्ल्यूडी) के सहायक अभियंता सुनील कुमार प्रसाद पहिल नजरि मे काज कें संतोषजनक बतौलनि।
निर्माण एजेंसीक प्रोपराइटर सुमन कुमार झा कहलनि जे सड़कक ई 12म बेर जांच अछि। हुनकर कहब छलनि जे एहि सं पहिने भेल 11 टा जांच मे काज संतोषजनक पाओल गेल छल। ओ दावा कयलनि जे तीनू ठाम अधूरा बताओल जा रहल सड़कक हिस्साक निर्माण पहिनहि आरईओ बेनीपुर द्वारा करा लेल गेल छल। हुनकर एजेंसी शेष 15.64 किलोमीटर सड़कक निर्माण पूरा कए देने अछि। बेर-बेर जांच सं नाराज प्रोपराइटर कहलनि जे भविष्य मे एहि तरहक कारबाइ भेल तं विभागक विरुद्ध मानसिक प्रताड़नाक मुकदमा कयल जायत।
