- बेगूसराय मे 2 किलोमीटर नमहर लाइल लागल
पटना, समदिया
साओनक दोसर सोमवारी पर सोमदिन बिहारक शिवालय सभ मे शिवभक्त सभक भारी भीड़ि उमड़ि पड़ल। हर-हर महादेव आ बोल बमक जयघोष सं मंदिर आ कांवरिया पथ गुंजायमान रहल। मुजफ्फरपुरक बाबा गरीबनाथ मंदिर मे स्थानीय श्रद्धालु आ कांवरिया सभ मिला कए करीब 2 लाख श्रद्धालुक पहुंचबाक अनुमान अछि। मंदिरक ऊपर हेलिकॉप्टर सं पुष्पवर्षा कए कांवरिया सभक स्वागत कएल गेल।
भागलपुरक अजगैबीनाथ मंदिर, उत्तरवाहिनी गंगा आ कांवरिया पथ पर सेहो हेलिकॉप्टर सं फूलक बरखा कएल गेल। पुष्पवर्षा शुरू होइतहि हर-हर महादेव आ बोल बमक जयघोष सं पूरा मेला क्षेत्र भक्तिमय भए गेल। सुल्तानगंज सं गंगाजल भरि कांवरिया सभ 105 किलोमीटर लंबा यात्रा करैत देवघर दिस विदा भेलाह। बेगूसरायक हरिगिरीधाम गढ़पुरा मे भोरहि सं श्रद्धालु सभक नमहर लाइन लागल रहल, जे करीब 2 किलोमीटर धरि पहुंचि गेल। लखीसरायक अशोक धाम, दरभंगाक बाबा कुशेश्वरनाथ, सोनपुरक बाबा हरिहरनाथ आ राजगीरक बाबा सिद्धनाथ मंदिर मे सेहो श्रद्धालु सभक भारी भीड़ि रहल। कुशेश्वरनाथ मंदिर मे राति करीब 12 बजे सं जलाभिषेक लेल लाइन लागय लागल छल, जे भोर धरि करीब 3 किलोमीटर नमहर भए गेल।
राजगीरक वैभारगिरि पर्वत पर स्थित बाबा सिद्धनाथ मंदिर मे श्रद्धालु 536 सीढ़ी चढ़ि महादेवक दर्शन करैत रहलाह। एहि दौरान एकटा छोट बालक सेहो सीढ़ी चढ़ैत देखल गेल।
सुल्तानगंज सं करीब 5 घंटा मे एक लाख कांवरिया गंगाजल भरि देवघर लेल विदा भेलाह। वाराणसीक दीपक कनौजिया अपन दिव्यांग मित्र प्रमोद पांडे कें कान्ह पर बैसाकए विगत आठ वर्ष सं देवघर लए जा रहल छथि। प्रमोद चलए मे असमर्थ छथि, मुदा दीपक हुनकर जलाभिषेकक अभिलाषा पूरा करैत आबि रहल छथि।
मुजफ्फरपुर मे कांवरिया सभक विश्राम लेल शिविर, स्वास्थ्य केंद्र, एंबुलेंस, चिकित्सा दल आ यात्री शेडक व्यवस्था कएल गेल अछि। बाबा गरीबनाथ मंदिर मे एक हजार सं बेसी स्वयंसेवक भीड़ प्रबंधन मे लागल छथि। पुलिस प्रशासन द्वारा कांवरिया पथ, मंदिर आ संवेदनशील स्थल सभ पर अतिरिक्त बल तैनात कए सादे वस्त्र मे सेहो निगरानी कएल जा रहल अछि। ज्योतिषाचार्य राकेश झा कहलनि जे साओन मास, सोमवारी आ प्रदोष व्रतक एक संग पड़नाइ शुभ संयोग अछि। एहि अवसर पर शिव-पार्वतीक पूजा, रुद्राभिषेक आ जलाभिषेकक विशेष महत्व अछि।
