एनडीआरएफ-एसडीआरएफक टीम तैनात
पटना। बिहार मे गंगा सहित प्रमुख नदीसभक जलस्तर बढ़लाक बाद बाढ़िक दायरा लगातार बढ़ि रहल अछि। राज्यक 12 जिलामे करीब 10 लाख लोक बाढ़िसं प्रभावित भेल छथि। एहि मे अरवल, पटना, भोजपुर, बक्सर, बेगूसराय, भागलपुर, मुंगेर, समस्तीपुर, खगड़िया, सारण, वैशाली आ कटिहारक 50सं बेसी प्रखंड शामिल अछि।
प्रभावित इलाकामे राहत आ बचावक काज तेज कए देल गेल अछि। एकरा संगहि जिला प्रशासनक संग-संग एनडीआरएफ आ एसडीआरएफक टीम लगातार राहत काज मे जुटल अछि। प्रभावित लोकसभ धरि भोजन, पेयजल, औषधि आ अन्य जरूरी सामग्री पहुंचेबाक लेल पैघ स्तर पर इंतजाम कएल गेल अछि।
आपदा प्रबंधन विभागक अनुसार, बाढ़ि प्रभावित इलाकामे लोकसभ कें सुरक्षित स्थान धरि पहुंचेबाक संग हुनका सभ लेल 36 सामुदायिक रसोइया चलाओल जा रहल अछि, जाहिमे एखन धरि 1 लाख 14 हजारसं बेसी लोक कें भोजन कराओल गेल अछि। प्रभावित परिवारसभक बीच ड्राइ फूडक करीब 2500 पैकेट सेहो बांटल गेल अछि। जखनकि शिविरसभ मे एखन धरि बाढ़ि प्रभावित इलाकासं निकालि कए 1553 लोक कें पहुंचाओल गेल अछि।
बाढ़ि प्रभावित इलाकामे स्वास्थ्य सेवा सुचारु रखबाक लेल 19 मोटरबोट एंबुलेंसक परिचालन कएल जा रहल अछि। बाढ़िक कारण सड़क मार्गसं अस्पताल आ स्वास्थ्य केंद्र धरि पहुंचनाइ कठिन भेला पर मोटरबोट एंबुलेंस महत्वपूर्ण भूमिका निभा रहल अछि। एहि सभक माध्यमसं गर्भवती महिला, बुजुर्ग, बच्चा आ गंभीर रोगीसभ कें जरूरत पड़ला पर स्वास्थ्य केंद्र धरि पहुंचेबाक व्यवस्था कएल गेल अछि।
बाढ़ि प्रभावित इलाकामे बीमारी पसरबाक आशंका कें देखैत 50 चिकित्सा शिविर लगाओल गेल अछि। बाढ़िक कारण सड़क संपर्क प्रभावित भेल इलाकामे आवागमन लेल 50 प्रखंड मे 912 नावक परिचालन कएल जा रहल अछि। नावक माध्यमसं प्रभावित लोकसभ कें सुरक्षित स्थान धरि पहुंचेबाक संग राहत सामग्री, खाद्य पदार्थ आ अन्य जरूरी सामान सेहो पहुंचाओल जा रहल अछि।
