बाढ़ि बचाव काजक कएलनि समीक्षा
पटना। बिहारक उपमुख्यमंत्री सह जल संसाधन मंत्री विजय कुमार चौधरी गुरुवार केँ सिंचाई भवन स्थित जल संसाधन विभागक कंट्रोल कमांड सेंटरक निरीक्षण कएलनि। एहि दौरान ओ वीडियो कॉन्फ्रेंसिंगक माध्यम सं राज्यक विभिन्न संवेदनशील आ बाढ़ि प्रभावित क्षेत्र मे चलि रहल फ्लड फाइटिंग काजक समीक्षा कएलनि आ संबंधित अधिकारी सभ सं वर्तमान स्थिति केर जानकारी लेलनि।
समीक्षाक दौरान पुनपुन आ दरधा नदीक बढ़ैत जलस्तर केँ लए विशेष रूप सं चर्चा भेल। एकर अतिरिक्त भागलपुर जिलाक खरीक प्रखंड मे स्थित काजीकोरैया-राघोपुर बांध आ विभिन्न कटाव प्रभावित क्षेत्र मे चलि रहल सुरक्षात्मक एवं बाढ़ि निरोधक काजक प्रगतिक जानकारी सेहो लेल गेल।
विजय कुमार चौधरी अधिकारी सभ केँ निर्देश देलनि जे राज्यक संवेदनशील आ कटाव प्रभावित क्षेत्र मे चलि रहल फ्लड फाइटिंग काज केँ पूरा तत्परता आ मुस्तैदी सं जारी राखल जाए। ओ कहलनि जे बाढ़ि आ कटावक स्थिति लगातार बदलैत रहैत अछि, तेँ संभावित खतरा केँ देखैत अधिकारी पहिनहि सं तैयार रहथि आ आवश्यकता पड़ला पर तत्काल कार्रवाई सुनिश्चित करथि।
ओ फ्लड फाइटिंग काजक सतत निगरानी पर विशेष जोर दैत कहलनि जे संवेदनशील क्षेत्र मे स्थिति पर लगातार नजर राखल जाए। स्थानीय स्तर सं भेटैत सूचना पर शीघ्र संज्ञान लेल जाए आ कोनो आपात स्थिति मे बिना समय गमौने आवश्यक कदम उठाओल जाए। मंत्री कंट्रोल कमांड सेंटरक माध्यम सं राज्यक विभिन्न क्षेत्रक नियमित निगरानी सुनिश्चित करबाक निर्देश सेहो देलनि।
ओ कहलनि जे तकनीक आ वीडियो कॉन्फ्रेंसिंगक माध्यम सं क्षेत्रीय स्थिति केर जानकारी लगातार प्राप्त कएल जाए, जाहि सं आवश्यकतानुसार संसाधन आ बचाव काज केँ तत्काल प्रभावित क्षेत्र मे लगाओल जा सकय। ओ कहलनि जे बाढ़ि आ कटाव प्रभावित क्षेत्र मे आम लोकक सुरक्षा सर्वोच्च प्राथमिकता अछि। एहि लेल विभागक अधिकारी आ अभियंता क्षेत्र मे लगातार सक्रिय रहथि आ स्थिति पर नजर राखथि।
विजय कुमार चौधरी कहलनि जे संभावित क्षति केँ समय रहैत नियंत्रित करबाक लेल स्थानीय प्रशासनक संग समन्वय स्थापित कए काज कएल जाए। ओ जल संसाधन विभागक सचिव, अभियंता आ पूरा टीम द्वारा बाढ़िक चुनौतीक बीच कएल जा रहल काजक सराहना कएलनि। अधिकारी आ कर्मी सभक उत्साहवर्धन करैत हुनका शुभकामना देलनि आ एहि तरहक तत्परता सं काज करैत रहबाक लेल कहलनि।
उपमुख्यमंत्री स्पष्ट निर्देश देलनि जे जाहि क्षेत्र मे कटाव अथवा जलस्तर बढ़बाक खतरा अछि, ओतय सुरक्षात्मक काज मे कोनो तरहक ढिलाई नहि होय। आवश्यकतानुसार मशीनरी, सामग्री आ मानव संसाधनक उपलब्धता सुनिश्चित कएल जाए।
ओ कहलनि जे विभागक कंट्रोल कमांड सेंटर बाढ़िक स्थिति पर निगरानी रखबाक आ संबंधित अधिकारी सभ धरि सूचना पहुंचेबाक काज मे महत्वपूर्ण भूमिका निभा रहल अछि। समीक्षा दौरान अधिकारी सभ उपमुख्यमंत्री केँ विभिन्न बाढ़ि एवं कटाव प्रभावित क्षेत्रक वर्तमान स्थिति आ ओतय चलि रहल फ्लड फाइटिंग काजक जानकारी देलनि।
