अतिक्रमण पर चलल नगर परिषदक बुलडोजर, नाला भेल मुक्त

 

• वार्ड 7 आ 14 मे तीन घंटा चलल अभियान

झंझारपुर, समदिया

झंझारपुर शहर मे नाला आ सार्वजनिक जमीन पर कब्जा करय बला लोकक विरुद्ध नगर परिषद प्रशासन एक बेर फेर बुलडोजर कारबाइ शुरू कए देलक अछि। शनिदिन वार्ड नंबर-7 आ 14 सं होइत मुख्य पथ पर सरस्वती शिशु विद्या मंदिर विद्यालय सं ब्रह्मस्थानक बीच बनल नाला कें अतिक्रमण मुक्त कराओल गेल। नगर परिषदक कारबाइ शुरू होइतहि अतिक्रमणकारी सभ मे हड़कंप मचि गेल। नगर परिषदक दल बुलडोजरक सहायता सं नाला पर कएल गेल अस्थायी आ स्थायी अतिक्रमण कें हटौलक। करीब तीन घंटा सं बेसी समय धरि चलल अभियानक दौरान नालाक जमीन कें खाली कराओल गेल, जाहि सं जलनिकासी व्यवस्था कें सुचारू बनाओल जा सकय। काफी समय सं अतिक्रमणक कारण नालाक अस्तित्व पर संकट उत्पन्न भए गेल छल आ बरसातक समय जलजमावक समस्या सेहो होइत छल। अतिक्रमण हटेबाक दौरान कोनो प्रकारक विरोध अथवा विवाद नहि हो, एहि लेल घटनास्थल पर पुलिस बलक सेहो तैनाती कएल गेल छल। नगर परिषद प्रशासन स्पष्ट कएलक अछि जे सार्वजनिक नाला, सड़क अथवा अन्य सरकारी जमीन पर कब्जा करय बला लोकक विरुद्ध अभियान आगू सेहो जारी रहत। अभियानक नेतृत्व स्वच्छता पदाधिकारी दीपक कुमार आ सिटी मैनेजर संजय कुमार कएलनि। एहि दौरान शंकर महतो, प्रवीण झा सहित नगर परिषदक कर्मी आ पुलिस बलक जवान उपस्थित छलाह। प्रशासनक एहि कारबाइ सं शहर मे अतिक्रमणक विरुद्ध चलि रहल अभियान कें लए कए लोकक बीच चर्चा तेज भए गेल अछि।