पेयजल आ स्वच्छता सेवा कें सुदृढ़ करबाक लेल मंथन
समस्तीपुर, समदिया
जिला मे पेयजल, स्वच्छता आ स्वच्छता व्यवहार सं संबंधित सेवा सभ कें बेसी प्रभावी, गुणवत्तापूर्ण आ जनोपयोगी बनयबाक उद्देश्य सं जिला स्तरीय अभिमुखीकरण कार्यशालाक आयोजन कएल गेल। कार्यशाला होटल प्रीतिकॉन मे आयोजित भेल। कार्यशालाक मुख्य विषय छल, सेवा स्तर मानकीकरणक माध्यम सं पेयजल आ स्वच्छता सेवा वितरण कें सुदृढ़ करब। कार्यशालाक आयोजन जिलाधिकारी रोशन कुशवाहाक उपस्थिति मे कएल गेल। एहि अवसर पर उप विकास आयुक्त सूर्य प्रताप सिंह, संयुक्त राष्ट्र बाल कोषक पदाधिकारी आ प्रतिनिधि सहित विभिन्न संबंधित विभागक पदाधिकारी उपस्थित छलाह। कार्यशाला मे पेयजल आ स्वच्छता सेवाक वर्तमान स्थिति, सेवा वितरणक गुणवत्ता, उपलब्ध संसाधन तथा आम लोक धरि सेवाक पहुंच संबंधी स्थितिक समीक्षा कएल गेल। सेवा स्तर मानकीकरणक माध्यम सं सेवा मे सुधारक विभिन्न पक्षपर विस्तार सं चर्चा भेल।
विशेषज्ञ आ संबंधित विभागक प्रतिनिधि सभ निर्धारित मानकक अनुरूप पेयजल आ स्वच्छता सेवा कें नीक बनयबाक, सेवा वितरण मे मौजूद कमी सभक पहचान करबाक तथा उपलब्ध आंकड़ाक आधारपर प्रभावी कार्ययोजना तैयार करबाक संबंध मे जानकारी देलनि। एहि अवसर पर जिलाधिकारी रोशन कुशवाहा कहलनि जे स्वच्छ आ सुरक्षित पेयजलक उपलब्धता तथा नीक स्वच्छता व्यवस्था प्रत्येक नागरिक लेल आवश्यक अछि। पेयजल आ स्वच्छता सेवा कें प्रभावी बनयबाक लेल विभाग सभक बीच नीक समन्वय, नियमित निगरानी तथा सेवा स्तरक वैज्ञानिक ढंग सं मूल्यांकन आवश्यक अछि। ओ संबंधित पदाधिकारी सभ कें निर्धारित मानकक अनुरूप सेवाक गुणवत्ता सुनिश्चित करबाक तथा आवश्यक सुधारात्मक कारबाइ करबाक पर जोर देलनि।
संयुक्त राष्ट्र बाल कोष, प्रिमोव तथा संबंधित विभागक प्रतिनिधि सभ पेयजल आ स्वच्छता सेवा वितरण कें सुदृढ़ करबाक तथा सेवा स्तर मानकीकरणक प्रक्रियाक संबंध मे प्रतिभागी सभ कें जानकारी देलनि। स्थानीय स्तरपर उपलब्ध सेवाक आकलन कए ओकरा निर्धारित मानकक अनुरूप विकसित करबाक पर विशेष जोर देल गेल। कार्यशालाक दौरान पेयजल आ स्वच्छता सेवाक गुणवत्ता मे निरंतर सुधार, नीक अंतरविभागीय समन्वय, आंकड़ा आधारित योजना निर्माण तथा प्रभावी क्रियान्वयन सुनिश्चित करबाक लेल आवश्यक बिंदु सभपर विस्तार सं विचार-विमर्श कएल गेल।
