सहरसा, समदिया
राष्ट्रीय खेल दिवसक अवसर पर मंगलदिन पटेल मैदान मे हॉकी एसोसिएशनक दिस सं कार्यक्रम आयोजित कएल गेल। कार्यक्रम मे जिलाक हॉकी खेलाड़ी सभ कें प्रोत्साहित करैत हुनका सभ कें टी-शर्ट प्रदान कएल गेल।
एहि सं पूर्व पटना स्थित प्राधिकरण मे सहरसा हॉकी एसोसिएशनक अध्यक्ष सुनील कुमार झा कें खेलक क्षेत्र मे हुनकर योगदान लेल सम्मानित कएल गेल छल। ओतहि सहरसाक 15 हॉकी खेलाड़ी कें सेहो सम्मानित करैत हॉकी स्टिक आ टी-शर्ट प्रदान कएल गेल छल।
कार्यक्रम कें संबोधित करैत हॉकी एसोसिएशनक अध्यक्ष सुनील कुमार झा कहलनि जे जिला मे हॉकी खेल कें बढ़ावा देबाक लेल प्रत्येक प्रखंड मे हॉकी प्रतियोगिता आ खेल गतिविधिक आयोजन कएल जायत। एहि आयोजनक माध्यम सं प्रतिभावान खेलाड़ी सभक पहचान कए हुनका सभ कें आगू बढ़यबाक प्रयास कएल जायत।
ओ कहलनि जे ग्रामीण क्षेत्र मे सेहो खेल प्रतिभाक कोनो कमी नहि अछि। जरूरत अछि जे प्रतिभावान खेलाड़ी सभ कें उचित मंच आ आवश्यक संसाधन उपलब्ध कराओल जाय।
एसोसिएशनक सचिव प्रमोद कुमार झा कार्यक्रमक सफल आयोजन मे महत्वपूर्ण भूमिका निभौलनि। बताओल गेल जे 30 अगस्त कें वर्षाक कारण खेल प्रतियोगिताक आयोजन नहि भए सकल छल। तकर बाद मंगलदिन पटेल मैदान मे खेलक आयोजन कएल गेल, जाहि मे खेलाड़ी सभ उत्साहपूर्वक भाग लेलनि।
एहि अवसर पर जिला खेल पदाधिकारी कुमारी तौसी, निगम पार्षद सह कबड्डी संघक सचिव आशीष रंजन सिंह, शैलेश कुमार झा, बादल कुमार बनर्जी, डॉ. प्रीति मिश्रा आ संजीव कुमार सहित अन्य लोक उपस्थित छलाह।
