- सुल्तानगंज मे 6 गोटेक डूबि कए मरल, कजरैली मे 2 बच्चीक भेटल शव
प्रदीप विद्रोही, भागलपुर
करमा-धरमा पर्वक तैयारीक बीच भागलपुर मे सोमदिन 8 परिवार लेल एहन पीड़ादायक दिन बनि गेल, जे ओ सभ कहियो नहि बिसरि सकत। सुल्तानगंज मे पूजा लेल पोखरि मे स्नान आ फूल तोड़बाक क्रम मे 6 गोटेक डूबि कए मृत्यु भए गेल, तं कजरैली मे पूजा लेल नहाय आ फूल चुनय गेल 2 मासूम बच्ची लापता भए गेली आ दोसर दिन हुनकर शव पोखरि मे भेटल। दुनू घटना सं क्षेत्र मे शोकक माहौल पसरि गेल अछि। जिनका घर मे पर्वक गीत गूंजबाक छल, ओतय आब चीत्कार आ शोक पसरि गेल अछि।
सुल्तानगंज प्रखंडक उधाडीह गाम मे करमा-धरमाक तैयारीक बीच ई हृदयविदारक घटना भेल। पूजा लेल पोखरि मे स्नान आ फूल तोड़बाक दौरान 6 लोक डूबि गेलाह। मृतकक पहिचान ज्योति कुमारी, अमित कुमार, आयुष कुमार, राहुल कुमार, पूजा कुमारी आ विकास कुमारक रूप मे भेल अछि। अमित, आयुष, राहुल, पूजा आ विकास सुल्तानगंज नगर परिषद क्षेत्रक विष्णु टोला, वार्ड संख्या-27क निवासी बताओल गेल छथि। मृत सभक उम्र 12 सं 14 वर्षक बीच बताओल जा रहल अछि।
घटनाक सूचना भेटिते स्थानीय प्रशासन आ पुलिसक दल घटनास्थल पर पहुंचि राहति-बचाव कार्य शुरू कएलक। मुदा छओ गोटेक प्राण नहि बचाओल जा सकल। शव कें पोस्टमार्टम लेल पठा देल गेल अछि।
ओतहि कजरैली थाना क्षेत्रक गौराचौकी हरिजन टोला मे रविदिन दुपहर करमा-धरमा पूजाक लेल नहाय आ फूल चुनय गेल दू नाबालिग बच्ची देर सांझ धरि घर नहि लौटल। परिजन आ ग्रामीण सभ राति भरि हुनकर खोज करैत रहलाह। सोमदिन भोर मे पोखरि मे दुनूक शव भेटलाक खबरि सं इलाका मे कोहराम मचि गेल।
मृत बच्चीक पहिचान मुन्ना दासक 12 वर्षीय बेटी रुपाली कुमारी आ मुकेश दासक 10 वर्षीय बेटी सरिताक रूप मे भेल अछि। दुनू गामक विद्यालय मे पांचम कक्षाक छात्रा छल। रुपाली चारि बहिन आ एक भाइ मे छल। हुनकर पिता राजमिस्त्री छथि। सरिता सात भाइ-बहिन मे छल आ हुनकर पिता हलुआईक काज करैत छथि। शव घर पहुंचिते दुनू परिवार मे चीत्कार मचि गेल।
परिजन बच्चीक मुंह सं खून निकलल आ शरीर पर हल्का चोटक निशान होयबाक बात कहलनि, मुदा पुलिस एकर पुष्टि नहि केने अछि। मृत्यु कए वास्तविक कारण पोस्टमार्टम रिपोर्ट अयलाक बादे स्पष्ट भए सकत।
घटनाक सूचना पर कजरैली पुलिस घटनास्थल पर पहुंचल। बाद मे घटनास्थल बायपास थाना क्षेत्र मे होयबाक जानकारी भेटल। दुनू थाना क्षेत्रक पुलिस आवश्यक प्रक्रिया पूरा कए शव कें पोस्टमार्टम लेल पठौलक। जिला प्रशासन मृतकक परिजनक प्रति गहींर संवेदना व्यक्त करैत नियमानुसार सहायता उपलब्ध करबाक प्रक्रिया शुरू केने अछि। घटनाक अन्य तथ्यक सेहो जांच कएल जा रहल अछि। करमा-धरमाक खुशीक बीच भेल एहि दुनू घटना सं भागलपुरक कतेको परिवार गहींर सदमा मे छथि। कतहु बेटीक घर लौटबाक प्रतीक्षा मृत्यु समाचार मे बदलि गेल, तं कतहु पूजाक लेल घर सं निकलल लोक फेर वापस नहि आबि सकल।
