आचार संहिता उल्लंघन मामिला मे लालू यादव पर आरोप तय

 

• लालू आरोप सं केलनि मना, 2011 केर अछि मामिला

• कोर्टक बाद विधायक ओसामा ओतय पहुंचलाह लालू

 

सीवान, समदिया

राष्ट्रीय जनता दल (राजद) केर राष्ट्रीय अध्यक्ष आ पूर्व मुख्यमंत्री लालू प्रसाद यादवक आचार संहिता उल्लंघन मामिला मे बृहस्पति कें सीवानक एसीजे-1 अरविंद कुमारक न्यायालय मे पेशी भेल। करीब 11 बजे न्यायालय मे उपस्थित भेलाक बाद हुनका पर लगाओल गेल आरोपक सारांश पढ़ि सुनाओल गेल। लालू प्रसाद आरोप स्वीकार करबा सं मना कयलनि। न्यायालय मे पेशीक बाद ओ राजद विधायक ओसामा शहाबक घर गेलाह आ ओतय दिवंगत सांसद मोहम्मद शहाबुद्दीनक पत्नी हिना शहाब सं भेंट कयलनि।

ई मामिला 2011 केर विधानसभा चुनाव सं जुड़ल अछि। ओहि समय लालू प्रसाद केंद्र सरकार मे रेलमंत्री छलाह। 8 अक्टूबर 2011 कें ओ दरौंदा विधानसभा क्षेत्र मे राजद प्रत्याशी परमेश्वर सिंहक पक्ष मे चुनाव प्रचार करय गेल छलाह। आरोप अछि जे निषेधाज्ञा लागू रहबाक बादो बिना अनुमति ध्वनि विस्तारक यंत्रक उपयोग कए सभा आ भाषण कयल गेल छल।

तत्कालीन अंचलाधिकारी शंकर महतो एकरा आचार संहिताक उल्लंघन मानैत लालू प्रसाद यादव आ प्रत्याशी परमेश्वर सिंहक विरुद्ध दरौंदा थाना मे कांड संख्या 146/11 दर्ज करौने छलाह। एहि मामिलाक सुनवाइ सीवान न्यायालय मे चलि रहल अछि। लालू प्रसादक अधिवक्ता कामेश्वर तिवारी आ धीरेंद्र कुमार हुनकर उपस्थिति दर्ज करौलनि। आब एहि मामिला मे गवाहीक प्रक्रिया शुरू होयत।

पेशीक दौरान राजद एमएलसी विनोद जायसवाल, विधायक ओसामा शहाब, पूर्व विधानसभा अध्यक्ष अवध बिहारी चौधरी, शैलेंद्र प्रताप, जिलाध्यक्ष विपिन कुशवाहा सहित पार्टीक पैघ संख्या मे नेता आ कार्यकर्ता उपस्थित छलाह। एहि सं पहिने लालू प्रसाद पचरुखीक उमेद पैलेस मे पहुंचि राति बितौने छलाह। ओतय राति आ भोर मे पार्टीक नेता आ कार्यकर्ता हुनकर स्वागत कयलनि।