- घर सं जबरदस्ती उठा कए 50 मीटर दूर सुनसान स्थान मे कएल गेल कुकर्म
बेगूसराय, समदिया
बेगूसराय मे 15 वर्षीया दिव्यांग नाबालिग संग सामूहिक दुष्कर्मक मामिला सोझां आयल अछि। घटना रतनपुर थाना क्षेत्रक अछि। आरोप अछि जे मानसिक रूप सं अस्वस्थ किशोरी कें घर सं जबरदस्ती उठा कए करीब 50 मीटर दूर एकटा सुनसान मकान मे लए जा कए दू गोटे दुष्कर्म कयलक। जानकारीक अनुसार, पीड़िताक पिता दिल्ली मे चायक दोकान चलबैत छथि। किशोरी अपन माय संग रहैत अछि। रविदिन राति करीब आठ बजे माय काज सं बाहर गेल छलीह। एहि दौरान किशोरी घर मे एकसर छल। आरोप अछि जे मोहल्लाक रहनिहार प्रकाश साह आ राकेश साह ओकरा जबरदस्ती उठा लए गेल।
राति करीब दस बजे किशोरी कनैत-बिलखैत बदहवास अवस्था मे घर घुरल, तखन घटनाक जानकारी भेटल। स्थानीय लोकक अनुसार, दुनू आरोपितक उम्र करीब 40 वर्ष अछि आ दुनू विवाहित छथि। चट्टी रोड लग दुनूक छोट-मोट कारोबार आ मसाला मिलक काज अछि।
पॉक्सो अधिनियम अंतर्गत मामिला दर्ज
घटनाक सूचना भेटिते पुलिस कारबाइ करैत दुनू नामजद आरोपित कें गिरफ्तार कए लेलक। पीड़िताक चिकित्सकीय जांच कराओल गेल अछि आ आरोपित सभ सं पूछताछ कयल जा रहल अछि। घटनाक बाद रतनपुर थाना लग स्थानीय लोकक भीड़ जुटि गेल। आक्रोशित लोक सभ आरोपित कें कड़ाइ सं सजा देबाक मांग कयलनि। सदर-वन डीएसपी प्रशांत कुमार कहलनि जे सूचना भेटिते पुलिस त्वरित कारबाइ कयलक आ घटना मे संलिप्त दुनू व्यक्ति कें पकड़ि लेल गेल। दुनू आरोपितक विरुद्ध पॉक्सो अधिनियम अंतर्गत मामिला दर्ज कए कारबाइ कयल जा रहल अछि। पुलिसक कहब अछि जे पीड़िताक चिकित्सकीय जांचक बादे दुष्कर्मक पुष्टि भए सकत। एहि मामिला मे पॉक्सो अधिनियमक निर्धारित मानक संचालन प्रक्रियाक पालन कयल जा रहल अछि।
