दरभंगा। बेनीपुर-मनीगाछी सड़क निर्माण मे गुणवत्ता आ देरीक शिकायत पर शनिदिन नेशनल क्वालिटी मॉनिटरक टीम जांच कयलक। करीब 18 किलोमीटर लम्बा एहि सड़कक निर्माण 23 करोड़ 92 लाख रुपैयाक लागत सं वर्ष 2024 सं कराओल जा रहल अछि। नियमानुसार, जनवरी 2026 धरि निर्माण काज पूरा होयबाक छल, मुदा एखनहु कतेको जगह काज अधूरा अछि।
स्थानीय विधायक राजेश कुमार मंडलक शिकायत पर केंद्रीय टीम सड़कक गुणवत्ता जांचय पहुंचल। टीम सड़कक मोटाइ, चौड़ाइ आ निर्माण सामग्रीक अनुपातक जांच कयलक। एहि टीम मे केंद्रीय मॉनिटर जगदीश गर्ग, ग्रामीण कार्य विभाग बेनीपुरक कार्यपालक अभियंता विवेक कुमार सोनी, सहायक अभियंता सुनील कुमार प्रसाद आ कनीय अभियंता विनीता कुमारी शामिल छलीह।
जांचक दौरान प्रत्येक 5 किलोमीटर पर सड़क खोदि क’ ओकर मोटाइ आ गुणवत्ताक जांच कएल गेल। टीम नमूना एकत्र क’ प्रयोगशाला जांच लेल पठौलक। अधिकारी सभ बतौलनि जे प्रयोगशालाक रिपोर्ट अयला के बाद विभाग के अंतिम रिपोर्ट सौंपल जायत। हालांकि, अधिकारी सभ स्थलीय जांच के संतोषजनक बतौलनि।
स्थानीय स्तर पर आरोप अछि जे निर्माण कंपनी प्राक्कलनक अनुरूप गुणवत्तापूर्ण काज नहि कएने अछि। मनीगाछी प्रखंडक भंडारीसम आ बाजितपुर पंचायत सहित बेनीपुरक सझुवार मे सड़क निर्माण अधूरा रहबाक बात सामने आयल अछि। सड़कक किनार फ्लैंकक निर्माण सेहो नहि कराओल गेल अछि।
जांचक दौरान जेडीयूक जिला उपाध्यक्ष मुरारी मोहन मिश्र आ प्रखंड जेडीयू अध्यक्ष संतोष कुमार सिंह सेहो मौजूद छलाह।
