जदयूक बैठक मे अनंत सिंह आ ललन सिंह नहि पहुंचलाह, नीरज कुमार पर आरोप-प्रत्यारोप तेज

पैघ नेतासभक अनुपस्थितिक बाद चर्चाक बाजार भेल गरम

पटना, समदिया

जनता दल यूनाइटेड (जदयू) विधानमंडल दलक महत्वपूर्ण बैसार शुक्रदिन पार्टी कार्यालय स्थित कर्पूरी सभागार मे भेल। भोरे 10 बजे सं दुपहर 1 बजे धरि करीब तीन घंटा चलल एहि बैसार मे मोकामा विधायक अनंत सिंह आ मंत्री अशोक चौधरी उपस्थित नहि भेलाह। उपमुख्यमंत्री विजेंद्र प्रसाद यादव आ केंद्रीय मंत्री ललन सिंह सेहो बैसार मे नहि देखल गेलाह। पैघ नेता सभक अनुपस्थितिक बाद पार्टी मे गुटबाजीक चर्चा तेज भए गेल अछि।

बैसार मे करीब 100 विधायक-विधान पार्षद

जदयूक राष्ट्रीय कार्यकारी अध्यक्ष संजय झाक अध्यक्षता मे भेल एहि बैठक मे करीब 100 विधायक आ विधान पार्षद शामिल भेलाह। पार्टीक राष्ट्रीय अध्यक्ष नीतीश कुमार सेहो किछु समय लेल बैठक मे पहुंचलाह, मुदा उद्घाटनक बाद ओतय सं निकलि गेलाह। बैठक मे स्वास्थ्य मंत्री निशांत कुमार, उपमुख्यमंत्री विजय कुमार चौधरी आ प्रदेश अध्यक्ष उमेश कुशवाहा उपस्थित छलाह। खास बात ई रहल जे बैठक मे मात्र निशांत कुमार संबोधित केलनि, जखन कि समापन भाषण प्रदेश अध्यक्ष उमेश कुशवाहा देलनि।

ललन सिंह, अनंत सिंह सहित किछु प्रमुख नेताक अनुपस्थिति सं पार्टीक भीतर गुटबाजीक अटकल तेज भए गेल। ओना जदयू विधायक भगवान सिंह कुशवाहा एहि तरहक चर्चा कें खारिज केलनि। अनंत सिंहक अनुपस्थिति आ नीरज कुमारक विरुद्ध हुनकर बयानक संबंध मे पूछला पर ओ कहलनि जे हुनका एहि संबंध मे जानकारी नहि अछि। ललन सिंहक बैठक मे नहि अयबाक कारण पूछला पर कहलनि जे ओ कोनो जरूरी काज मे व्यस्त होयताह।

भगवान सिंह कुशवाहा कहलनि जे तीन घंटा धरि चलल बैठक मे मात्र अभिमुखीकरण कार्यक्रम भेल आ पार्टी मे कोनो गुटबाजी नहि अछि। हुनकर कहब छल जे पार्टी मे नीतीश कुमार जे कहैत छथि, ओकरे अंतिम मानल जाइत अछि। ऊर्जा मंत्री बुलो मंडल सेहो कहलनि जे बैठक मे मात्र अभिमुखीकरण कार्यक्रम भेल आ दोसर कोनो विषय पर चर्चा नहि भेल। ओ पार्टी मे गुटबाजी अथवा नेता सभक रोषक चर्चा कें सेहो खारिज केलनि।

एमएलसी चुनाव मे नीरज कें हर हाल मे हरायब : अनंत

ओतहि मोकामा विधायक अनंत सिंह कहलनि जे हुनका तं एहि बैठकक जानकारीए नहि छल। विधान पार्षद नीरज कुमारक विरुद्ध मोर्चा खोलबाक सवाल पर ओ कहलनि जे एमएलसी चुनाव मे नीरज कुमार कें जरूर हरौताह आ हुनकर जमानत धरि नहि बचत। अनंत सिंह आरोप लगौलनि जे नीरज कुमार चारि बेर हुनकर चुनावक विरोध मे काज केने छथि आ ललन सिंहक चुनाव मे सेहो हुनकर भूमिका रहल अछि। ओ हथियार राखि कए पकड़बौलाक आरोप सेहो लगौलनि। अनंत सिंहक कहब छल जे हुनका जेल पठाओल गेल छल, मुदा तखन पार्टी नीरज कुमारक विरुद्ध कोनो कारबाइ नहि केलक। ओ कहलनि जे पार्टीक बैठक मे ओ नार्को टेस्ट करबाक बात सेहो उठेने छलाह।

नीरज कुमार आरोप पर देलनि सफाई

विधान पार्षद नीरज कुमार अनंत सिंह द्वारा लगाओल आरोप पर प्रतिक्रिया दैत कहलनि जे बहुत लोक हुनका पर आरोप लगा रहल छथि। ओ कहलनि जे अपराधीक लेल ओ कहर छथि। एकरा बाद एके-47 रखबेबाक आरोप पर कहलनि जे जं आरोप लगेनिहार लग प्रमाण अछि तं न्यायालयक शरण मे जाइथ। अनर्गल आरोप लगेनाइ उचित नहि अछि। नार्को टेस्टक सवाल पर नीरज कुमार कहलनि जे एहि लेल न्यायालय मे आवेदन देल जाय। हुनकर कहब छल जे हुनकर जीवन पारदर्शी अछि आ ओ अपन जीवन मे एहि तरहक घिनौन काज नहि केने छथि। एमएलसी चुनाव लड़बाक सवाल पर ओ कहलनि जे एहि संबंध मे निर्णय पार्टी करत।