मधुबनी। स्वतंत्रता दिवसक अवसर पर मधुबनी मिथिला कला आ संस्कृतिक क्षेत्र मे नव विश्व कीर्तिमान स्थापित कएलक अछि। रामचरितमानस पर आधारित 108 मीटर लम्बा विशाल मिथिला पेंटिंग विश्व रिकॉर्ड कायम कएलक अछि। एहि भव्य कलाकृति मे रामायणक संपूर्ण गाथा कें पारंपरिक शैली मे 52 प्रमुख प्रसंगक माध्यम सं उकेरल गेल अछि।
एकर संगहि स्थानीय कलाकार सभकें सीधा वैश्विक बाजार सं जोड़बाक लेल ‘मिथिला पेंटिंग-सह-ई-कॉमर्स पोर्टल’क सेहो विधिवत शुभारंभ कएल गेल।
मिथिला चित्रकला संस्थानक करीब 180 वर्तमान आ पूर्ववर्ती छात्र-छात्रा सभ मात्र चारि दिनक अथक प्रयास सं 108 मीटर लम्बा एहि पेंटिंग कें तैयार कएलनि। एहि उपलब्धि सं मिथिला चित्रकलाक वैश्विक पहचान कें नव विस्तार भेटबाक उम्मीद अछि।
डीएम आनंद शर्माक ड्रीम प्रोजेक्टक अंतर्गत शुरू कएल गेल ई-कॉमर्स पोर्टलक माध्यम सं कलाकार सभ अपन उत्पाद देश-विदेशक बाजार मे सीधा बेचि सकताह। एकरा सं स्थानीय कलाकार सभकें अपन कला लेल पैघ बाजार भेटबाक संगहि आर्थिक रूप सं सेहो लाभ होएबाक संभावना अछि।
समारोह मे राज्यसभा सांसद संजय कुमार झा आ मंत्री लेसी सिंह एहि पहल कें मिथिलाक पहचान लेल ऐतिहासिक कदम बतौलनि। हुनका सभक अनुसार मिथिला चित्रकला कें डिजिटल बाजार सं जोड़ला सं स्थानीय कलाकार सभकें नव अवसर भेटत आ पारंपरिक कला कें वैश्विक स्तर पर बढ़ावा भेटत।
कार्यक्रमक अंत मे संस्थानक मेधावी छात्र-छात्रा सभकें पुरस्कृत कएल गेल। एहि अवसर पर उपनिदेशक नीतीश कुमार, लेखा पदाधिकारी सुरेंद्र प्रसाद यादव सहित कतेको गणमान्य लोक उपस्थित छलाह।
