दरभंगा, समदिया
बिहार मे विकास कार्य कें गाम धरि पहुंचाबयक पहल तेज कएल जा रहल अछि। दरभंगा संसदीय क्षेत्रक विकास योजना मे तेजी आनबाक लेल स्थानीय सांसद सह लोकसभा मे भाजपा सचेतक डा. गोपाल जी ठाकुर बृहस्पति कें बिहारक मुख्यमंत्री सम्राट चौधरी सं भेट कए विभिन्न मुद्दापर विस्तार सं चर्चा कएलनि। सांसद मुख्यमंत्रीक समक्ष दरभंगा एयरपोर्टक समीक्षा करबाक आग्रह कएलनि, जाहि सं प्रधानमंत्री नरेंद्र मोदी द्वारा नवंबर मे प्रस्तावित उद्घाटनक तैयारी मे तेजी आबि सकय। ओ एयरपोर्ट विस्तार, यात्री सुविधा आ संपर्क व्यवस्था कें समयपर पूरा करबाक बात कहलनि। सांसद दरभंगा रिंग रोडक प्रक्रिया तेज करबाक, कुशेश्वरस्थान कें पटना-पूर्णिया एक्सप्रेसवे आ दरभंगा एयरपोर्ट सं जोड़बाक लेल स्पर लिंक विकसित करबाक तथा सुपौल-दरभंगा फोरलेनक निर्माण कार्य मे तेजी आनबाक आग्रह कएलनि। बेनीपुर आ बिरौल मे केंद्रीय विद्यालयक स्थापना लेल आवश्यक भूमि आ राज्यस्तरीय प्रक्रिया शीघ्र पूरा करबाक मांग सेहो कएलनि। ओ दरभंगा शहर मे यातायातक दबाव घटाबय लेल प्रस्तावित एलिवेटेड रोड आ लंबित रेलवे ओवरब्रिजक निर्माण मे तेजी, दरभंगा एम्सक निर्माण कार्य कें गति देबाक तथा रैयाम आ सकरी चीनी मिल कें पुनः चालू करबाक प्रक्रिया तेज करबाक आग्रह कएलनि। सांसद जलजमावक स्थायी समाधान, आधुनिक खेल सुविधा, ग्रामीण क्षेत्र मे औद्योगिक विकास, नमो गार्डन लेल भूमि उपलब्ध कराबय तथा दरभंगा कें मखाना उत्पादन, प्रसंस्करण आ निर्यातक प्रमुख केंद्र बनेबाक दिशा मे पहल करबाक बात कहलनि। मैथिली कें शास्त्रीय भाषाक दर्जा देबाक लेल राज्यक प्रस्ताव शीघ्र केंद्र सरकार कें पठेबाक आग्रह सेहो कएलनि। डा. ठाकुर कहलनि जे दरभंगाक विकासक गति शहर सं गाम, मुहल्ला आ गली धरि पहुंचाबय लेल मुख्यमंत्री सं निर्णायक चर्चा भेल अछि।
=========================================================
