- महापौर बैन प्रिया कहलनि जे वेंडिंग जोन बनला सं फुटकर विक्रेताक समस्या दूर होयत
सहरसा, समदिया
नगर निगम क्षेत्रक फुटकर विक्रेतासभक समस्या समाधान आ हुनका सभ कें व्यवस्थित ठाम उपलब्ध करयबाक लेल महापौर बैन प्रिया बुधदिन नगर निगम कार्यालय स्थित अपन कक्ष मे फुटकर विक्रेताक प्रतिनिधि सभ सं भेंट कएलनि। एहि दौरान प्रतिनिधि सभ महापौर कें अपन विभिन्न समस्या सं अवगत करौलनि। संगहि शहर मे वेंडिंग जोनक निर्माण कें लए कए विस्तार सं चर्चा भेल। महापौर बैन प्रिया कहलनि जे फुटकर विक्रेता सेहो शहरक अभिन्न अंग छथि आ हुनकर समस्याक समाधान करब नगर निगमक दायित्व अछि। ओ कहलनि जे 16 सितंबर 2023 कें आयोजित सामान्य बोर्डक बैसार मे शहरक विभिन्न स्थान पर वेंडिंग जोन बनयबाक प्रस्ताव पारित भेल छल, मुदा एखन धरि एहि दिशा मे काज शुरू नहि भए सकल अछि। महापौर नगर आयुक्त प्रभात झा आ संबंधित पदाधिकारी सभ कें वेंडिंग जोनक निर्माण शीघ्र शुरू करबाक लेल आवश्यक निर्देश देलनि। नगर आयुक्त वेंडिंग जोनक निर्माण लेल तीन मासक समय लेलनि।
महापौर कहलनि जे नगर निगमक प्रयास अछि जे निर्धारित समय-सीमाक भीतर वेंडिंग जोनक निर्माण पूरा कए एकरा फुटकर विक्रेता सभ कें उपलब्ध करा देल जाय। वेंडिंग जोन बनला सं फुटकर विक्रेता सभ कें स्थायी आ व्यवस्थित ठाम भेटत। संगहि शहरक सड़क पर अव्यवस्थित ढंग सं होइत फुटकर बिक्री कें व्यवस्थित करबा मे मदद भेटत आ यातायात व्यवस्था सेहो सुचारु करबा मे सहायक होएत।
===========================================================
