सहरसा: जिलाक बनगांव थाना क्षेत्रक बासुदेवा गाम स्थित मध्य विद्यालय बासुदेवामे शनिदिन मध्याह्न भोजन खएलासं करीब दू दर्जन बच्चाक तबीयत बिगड़ि गेल। बच्चासभकें अस्पतालमे भर्ती कराओल गेल, जतय चिकित्सक प्राथमिक उपचारक बाद सभक स्थिति खतरासं बाहर बतौलनि।
भोजन खएलाक बाद जी मिचलायब, उल्टी आ बेहोश होमय जकां स्थिति उत्पन्न भेलाक बाद स्कूलक प्राचार्य, शिक्षक आ ग्रामीणसभ आनन-फाननमे बच्चासभकें अस्पतालमे भर्ती करौलनि।
किछु बच्चासभकें बरियाही पीएचसी पठाओल गेल, जखनकि किछु कें सदर अस्पताल सहरसा पठाओल गेल। सदर अस्पतालमे बीमार 12 बच्चाकें भर्ती कराओल गेल। घटनाक बाद स्कूलमे पढ़निहार बच्चासभक स्वजनमे आक्रोश व्याप्त अछि।
सदर अस्पताल पहुंचल स्वजन बतौलनि जे शनिदिन स्कूलमे बच्चासभकें देल गेल मध्याह्न भोजनमे एक बच्चाक थारीमे छिपकली देखल गेल। एकरा बाद स्कूलमे हल्ला मचि गेल। एहि दौरान करीब दू दर्जन बच्चा भोजन खा चुकल छलाह। भोजन खएलाक बाद बच्चासभक तबीयत बिगड़य लागल।
सदर अस्पतालमे भर्ती बच्चासभमे सत्संग कुमार, दिनकर कुमार, बल्लू कुमार (कक्षा पांचम), अविनाश कुमार (कक्षा तेसर), सोनू कुमार (कक्षा चारिम), सुमित कुमार (कक्षा पांचम), बाबुल कुमार (कक्षा पांचम), खुशी कुमारी (कक्षा दोसर), स्वाति कुमारी (कक्षा पांचम), प्रेम कुमार (कक्षा तेसर) आ अमृत कुमार (कक्षा पांचम) सहित कुल 12 बच्चा शामिल छलाह।
घटनाक सूचना भेटिते शिक्षा विभाग आ प्रशासनक टीम जांचमे जुटि गेल। बरियाही पीएचसीमे सेहो करीब एक दर्जन बच्चाकें ग्रामीण, स्कूल प्राचार्य आ शिक्षकक दिससं इलाज लेल पठाओल गेल। बरियाहीमे बच्चासभक प्राथमिक उपचार कएल गेल।
चिकित्सक बतौलनि जे इलाज आ जांचक दौरान कोनो विषाक्त पदार्थ नहि भेटल अछि। बच्चासभसं हुनकर स्थिति बुझि कए उपचार कएल जा रहल अछि।
बरियाही स्कूलमे पहुंचल स्कूलक शिक्षक अर्जुन तांती बतौलनि जे एनजीओसं भोजन पहुंचलाक बाद ओकरा स्कूलक बर्तनमे पलटल गेल। स्कूलक रसोइया आ अन्य शिक्षक भोजन चाखलाक बाद छात्रसभकें देलनि। एहि दौरान एक छात्रक थारीमे छिपकली देखल गेल। छात्रसभ बीमार होमयक बात बतौलनि, तकर बाद प्रशासन कें सूचना दए आनन-फाननमे बच्चासभकें अस्पताल पठाओल गेल।
घटनाक सूचना भेटलाक बाद डीएम, एसपी आ अन्य अधिकारी सदर अस्पताल पहुंचलाह आ भर्ती बच्चासभक हालचाल लेलनि।
