- कर्मचारी संघक धरना 24म दिन सेहो रहल जारी
दरभंगा, समदिया
बिहार चिकित्सा एवं जनस्वास्थ्य कर्मचारी संघ, विशेष शाखा, डीएमसीएचक बैनरतले अधीक्षक डॉ. जगदीश चंद्र कें पद सं हटेबाक तथा डीएमसीएचक विभिन्न समस्यासभक समाधानक मांग कें लए चलि रहल धरना-सत्याग्रह बुधदिन 24म दिनो सुपर स्पेशियलिटी अस्पताल परिसर मे जारी रहल। संघक अध्यक्ष अनिल कुमार सिन्हा तथा मंत्री अजय कुमार साह बतौलनि जे स्थानीय स्तरक समस्यासभक समाधान नहि होयबाक कारण 6 अगस्त सं मांग सभ पूरा होएधरि अनिश्चितकालीन भूख हड़ताल आरंभ कएल जाएत। संघक आरोप अछि जे अधीक्षकक संवेदनहीन रवैयाक कारण कर्मचारी सभ कें आंदोलन तीव्र करबाक लेल बाध्य होमए पड़ल अछि। संघक अनुसार महिला कर्मी संगीता कुमारी सं संबंधित पत्र एखन धरि वापस नहि लेल गेल अछि। ब्लड बैंक मे कथित अनियमितता सं संबंधित कर्मी सभ पर कारबाइ नहि भेल अछि, एसीपीक बकाया भुगतान लंबित अछि, सुपर स्पेशियलिटी अस्पताल मे इंडोर सेवा एखन धरि आरंभ नहि कएल गेल अछि तथा घूसखोरी, दलाली आ वित्तीय अनियमिततापर रोक लगाबय लेल कोनो प्रभावकारी कारबाइ नहि कएल गेल अछि। संघ एहि सभ मामिलाक निष्पक्ष जांच करैत दोषी सभ पर आवश्यक कारबाइ करबाक मांग स्वास्थ्य मंत्री सं केने अछि।
धरनास्थल पर मो. जमील आ रामानंद पासवानक संयुक्त अध्यक्षता मे सभा आयोजित भेल। सभा मे प्रकाश कुमार सहनी, अजय कुमार साह, रामावतार यादव, मधु महतो, बैद्यनाथ लाल देव, विजय कुमार, उषा कुमारी, संगीता कुमारी सहित पैघ संख्या मे कर्मचारी सभ उपस्थित छलथि। सभ उपस्थित कर्मचारी सभ 6 अगस्त सं प्रस्तावित अनिश्चितकालीन भूख हड़ताल कें सफल बनाबय तथा मांग सभ पूरा होएधरि आंदोलन निरंतर जारी रखबाक संकल्प लेलनि।
