प्रदीप विद्रोहीक रिपोर्ट
भागलपुर जिला सं अत्यंत दुखद आ हृदयविदारक घटना सामने आएल अछि। सुल्तानगंज मे गंगा नदी मे स्नान करबा लेल गेल 10 बच्चा डूबि गेल। एहि भीषण दुर्घटना मे एखन धरि 6 बच्चाक शव बरामद कएल जा चुकल अछि, जखन कि 4 बच्चा एखनहुं लापता अछि। लापता बच्चाक खोज लेल नदी मे युद्धस्तरपर अभियान चलाओल जा रहल अछि। ई दर्दनाक घटना सुल्तानगंज नगर परिषदक वार्ड संख्या 27 सं जुड़ल अछि। बताओल जा रहल अछि जे वैकुंठपुर दुधैला निवासी सभ बच्चा कर्मा-धर्मा पूजाक पावन अवसर पर पारंपरिक स्नान लेल नारायणपुर दियारा क्षेत्र मे गेल छल। स्नान करैत समय नदीक गहराइ आ तेज धारक सही अनुमान नहि भए सकल आ सभ बच्चा नदीक तेज धार मे बहि गेल।
6 बच्चाक शव बरामद, 4 केर खोज जारी
सुल्तानगंजक तरेटा गाम मे भेल एहि दुर्घटना मे एखन धरि 6 बच्चाक शव बरामद कएल जा चुकल अछि, जखन कि 4 बच्चाक कोनो पता नहि चलल अछि। कर्मा-धर्मा पर्वक अवसर पर भेल एहि हृदयविदारक घटनाक बाद गाम मे चीत्कार मचल अछि। परिजन कानि-कानि कए बेहाल छथि।
राहति-बचाव कार्य तेज
दुर्घटनाक जानकारी भेटिते स्थानीय स्तर पर अफरा-तफरी मचि गेल। सूचना भेटलाक बाद प्रशासन आ पुलिसक दल तुरंत घटनास्थल पर पहुंचल। लापता चारू बच्चा कें तकबाक लेल नदी मे सघन खोज अभियान चलाओल जा रहल अछि। स्थानीय लोक सेहो बचाव कार्य मे सहयोग करैत घटनास्थल पर जुटल छथि।
घटनाक जानकारी पसरिते घटनास्थल पर पैघ संख्या मे ग्रामीण आ परिजन जुटि गेलाह। बताओल जा रहल अछि जे दुर्घटनाक शिकार भेल बच्चा लगपासक दुधैला क्षेत्रक रहनिहार छल। घटनाक बाद पूरा इलाका शोक मे डूबल अछि।
पुलिस आ प्रशासनक अधिकारी घटनास्थल पर उपस्थित छथि आ लापता बच्चाक खोजक संगहि घटनाक संबंध मे आवश्यक जानकारी जुटा रहल छथि। प्रशासन दिस सं मृत बच्चाक सटीक पहिचान आ घटनाक विस्तृत आधिकारिक विवरणक पुष्टि एखन बांकी अछि।
