बिहार एमएलसी चुनाव: स्नातक आ शिक्षक कोटाक 8 सीट पर 23 अक्टूबर के मतदान, मैदान मे 150 प्रत्याशी
पटना। बिहार विधान परिषदक 8 सीट लेल 23 अक्टूबर के मतदान होयत। एहि चुनाव मे 5.32 लाख सं बेसी मतदाता 150 प्रत्याशीक भाग्यक फैसला करताह।
विधान परिषद मे शिक्षक आ स्नातक कोटाक 8 सीट पर 23 अक्टूबर के मतदान होएबाक अछि। एकरा लेल निर्वाचन आयोग तैयारी के आखरी रूप द’ रहल अछि।
कुल 933 मतदान केंद्र बनाओल गेल अछि, जतय 532847 मतदाता अपन वोट देताह। एहि मे 386199 पुरुष आ 146611 महिला मतदाता छथि।
स्नातक श्रेणीक सीट लेल कुल 492594 आ शिक्षक श्रेणीक सीट लेल 40253 मतदाता छथि। एहि मे 37 मंगलामुखी (थर्ड जेंडर) मतदाता शामिल छथि।
शिक्षक कोटाक चारि सीट (पटना, दरभंगा, सारण आ तिरहुत) आ स्नातक कोटाक चारि सीट (पटना, दरभंगा, तिरहुत आ कोसी) पर चुनाव भए रहल अछि।
शिक्षक कोटाक सीट लेल 40253 आ स्नातक श्रेणीक सीट लेल 492594 मतदाता छथि। चुनावी मैदान मे कुल 150 प्रत्याशी छथि। मतदानक संगहि हुनका सभक भाग्यक फैसला होयत आ 27 अक्टूबर के मतगणनाक बाद विजेताक घोषणा कएल जाएत।
दलीय आ निर्दलीय मिला कए कुल 164 अभ्यर्थी नामांकन केने छलाह। दस्तावेजक कमी आ तथ्य संबंधी त्रुटिक कारण ओहि मे सं 12 गोटेक नामांकन पत्र रद्द भए गेल छल।
दू निर्दलीय अभ्यर्थी अपन नामांकन वापस लए’ लेने छलाह। एकर बाद कुल 150 प्रत्याशी मैदान मे बचल छथि। ओहि मे 90 प्रत्याशी स्नातक कोटाक चारि सीट लेल चुनाव लड़ि रहल छथि। शिक्षक कोटाक सीट लेल कुल 60 प्रत्याशी मैदान मे छथि।
