पटना। बिहार मे प्रतियोगी परीक्षा कें लए आंदोलन कए रहल छात्र सभ आ राज्य सरकारक बीच बृहस्पति कें भेल वार्ताक बाद कतेको महत्वपूर्ण मांग पर सहमति बनल। शिक्षा विभागक सचिवक अध्यक्षता मे भेल बैसार मे छात्र प्रतिनिधिमंडलक सभ लिखित मांग पर बिंदुवार चर्चा कएल गेल। बैसारक बाद छात्र सभ सर्वसम्मति सं आंदोलन समाप्त करबाक निर्णय लेलनि।
बैसार मे सभ सं महत्वपूर्ण निर्णय शिक्षक भर्ती परीक्षा टीआरई-4 कें लए भेल। सरकार छात्र सभक एकल परीक्षा आयोजित करबाक मांग स्वीकार कए लेलनि। संगहि ‘एक अभ्यर्थी, एक परिणाम’क संदर्भ मे नियमानुसार आगू कारबाइ करबाक सहमति सेहो बनल।
सरकार 70म बीपीएससी परीक्षा मे पारदर्शिता सं जांच, बिहार कर्मचारी चयन आयोगक भर्ती परीक्षा समयबद्ध ढंग सं आयोजित करब, 1,799 दरोगाक पदक भर्ती परीक्षा केर जांच तथा सहायक प्राध्यापक नियुक्ति सं पहिने बिहार पात्रता परीक्षा आयोजित करबाक मांग पर सेहो निर्णय लेलक।
परीक्षा सुधार लेल पटना उच्च न्यायालयक न्यायाधीशक अध्यक्षता मे गठित होमयवला विशेषज्ञ समितिक समक्ष शिकायतकर्ता सभ कें साक्ष्यक संग अपन पक्ष आ सुझाव राखबाक अवसर देल जाएत। समितिक अनुशंसाक आधार पर आगू कारबाइ कएल जाएत। 1,799 दरोगा भर्ती केर आगूक प्रक्रिया सेहो समितिक रिपोर्टक बादे कएल जाएत। ओतहि बिहार कर्मचारी चयन आयोग शीघ्र परीक्षा कैलेंडर जारी कए समय पर परीक्षा आयोजित करबाक कारबाइ करत।
बैसार मे पुस्तकालयाध्यक्षक रिक्तिक अनुरूप बहाली प्रक्रिया शीघ्र शुरू करबाक सहमति सेहो बनल। संविदा कर्मी सभ कें भर्ती प्रक्रिया मे अंक अथवा वेटेज देल जाएत तखन अलग कोटा निर्धारित करबाक मुद्दा पर उच्चस्तरीय समिति गठित कए सरकारक प्रावधानक अनुरूप विचार कएल जाएत।
बिहारक सभ भर्ती प्रक्रिया मे अधिकतम डोमिसाइल नीति लागू करबाक संबंध मे न्यायविद सं भेटल परामर्शक अनुरूप नियमानुसार कारबाइ करबाक निर्णय लेल गेल। भर्ती परीक्षा मे अधिकतम उम्र सीमा सं जुड़ल प्रस्ताव सेहो समितिक समक्ष विचार लेल राखबाक सहमति बनल।
सरकार बीपीएससीक तर्ज पर आयोजित होमयवला भर्ती परीक्षा मे प्रश्नपत्र, ओएमआर शीट आ उत्तर पुस्तिका सं जुड़ल पारदर्शिता सुनिश्चित करबाक प्रस्ताव विशेषज्ञ समितिक समक्ष राखत। बीपीएससी द्वारा आयोजित एईडीओ, सेनेटरी सहित अन्य परीक्षा मे प्रश्नपत्र लीकक निष्पक्ष जांच लेल आर्थिक अपराध इकाई द्वारा नियमानुसार कारबाइ कएल जा रहल अछि।
मुख्यमंत्री सम्राट चौधरी सोशल मीडिया मंच एक्स पर लिखलनि जे छात्र सभक मांग कें लए सरकार शुरूए सं गंभीर रहल अछि। ओ कहलनि जे एहि बेर टीआरई-4 परीक्षा एकल चरण मे आयोजित कएल जाएत आ छात्र सभक मांगक संबंध मे नौटा अन्य महत्वपूर्ण निर्णय सेहो लेल गेल अछि।
मुख्यमंत्री कहलनि जे विभिन्न परीक्षा मे सुधार लेल ‘परीक्षा सुधार पर एक विशेषज्ञ समिति’ गठित कएल गेल अछि। पटना उच्च न्यायालयक न्यायाधीशक अध्यक्षता मे गठित एहि समितिक समक्ष परीक्षा सं संबंधित छात्र सभक शिकायतक सेहो सुनवाइ होयत।
ओ कहलनि जे छात्र सभक समस्याक त्वरित समाधान लेल ‘विद्यार्थी सहयोग पोर्टल’ आ ‘विद्यार्थी सहयोग शिविर’ शुरू कएल गेल अछि। एहि माध्यम सं छात्र सभक समस्याक समाधान 30 दिनक भीतर कएल जा रहल अछि। मुख्यमंत्री कहलनि जे सरकार छात्र सभक कल्याण आ हुनकर उज्ज्वल भविष्य लेल प्रतिबद्ध अछि।
