पटना। दरभंगाक नेहरू स्टेडियम कें करीब 200 करोड़ टकाक लागत सं राष्ट्रीय स्तरक खेल परिसरक रूप मे विकसित कएल जाएत। एकर बाद 10 एकड़ मे फैलल ई परिसर दरभंगा मे विभिन्न खेलक हबक रूप मे विकसित होयत।
सेंटर ऑफ एक्सीलेंसक रूप मे परिसरक विकास एहि तरहे कएल जाएत जाहि सं एतय राष्ट्रीय स्तरक डे-नाइट मैचक आयोजन सेहो संभव भ’ सकय। सरकार कें भरोसा अछि जे आगूक दिन मे ई परिसर दरभंगा कें बिहारक प्रमुख खेल केंद्रक रूप मे स्थापित करत। एतय सं निकलनिहार प्रतिभा देश-दुनिया मे बिहारक नाम रोशन करत।
मुख्यमंत्री सम्राट चौधरी शुक्रदिन लोक सेवक आवास स्थित संकल्प सभागार मे बैसार कए नेहरू स्टेडियमक प्रस्तावित कायाकल्प आ ‘सेंटर ऑफ एक्सीलेंस’क विस्तृत समीक्षा केलनि। दरभंगाक विधायक संजय सरावगी, जे भाजपा कें प्रदेश अध्यक्ष छथि, सेहो बैसार मे उपस्थित छलाह।
बैसार मे प्रस्तावित क्रिकेट स्टेडियम आ स्पोर्ट्स कॉम्प्लेक्सक प्रस्तुतीकरणक अवलोकन कएल गेल। सरावगी कहलनि जे दरभंगा लेल ई स्टेडियम मात्र नहि, बल्कि हजारों युवा सभक सपना कें उड़ान देबाक अवसर अछि।
दरभंगाक खिलाड़ी सभ कें आब खेलक सुविधा लेल पैघ शहर दिस पलायन नहि करय पड़त, बल्कि विश्वस्तरीय प्रशिक्षण आ संसाधन हुनकर अपन शहर मे उपलब्ध होयत।
प्रस्तावित परिसर मे राष्ट्रीय स्तरक अत्याधुनिक क्रिकेट स्टेडियम रहत, जाहि मे डे-नाइट मैच लेल हाई मास्ट लाइट, हाइब्रिड टर्फ पिच आ सुविधायुक्त पवेलियनक व्यवस्था रहत।
ओतहि इनडोर मल्टीपर्पज हॉल मे स्विमिंग पूल, बॉक्सिंग रिंग, जूडो-रेसलिंग क्षेत्र, चारि बैडमिंटन कोर्ट, बास्केटबॉल, स्क्वैश आ जिम जेहन आधुनिक सुविधा रहत।
खिलाड़ी सभक बेहतर प्रदर्शन लेल स्पोर्ट्स साइंस, बायो-मैकेनिक्स आ मेडिकल सुविधाक सेहो विकास कएल जाएत। बाहर सं आबि रहल खिलाड़ी सभ लेल 100 बेडक छात्रावास, अतिथि गृह आ डाइनिंग हॉलक व्यवस्था रहत। लॉन टेनिस, वॉलीबॉल आ नेट प्रैक्टिस पिचक संग सौर ऊर्जा आधारित व्यवस्था आ मल्टीलेवल पार्किंग सेहो बनाओल जाएत।
