पटना। आपदा प्रबंधन विभाग बिहारक पांच जिला पूर्वी चंपारण, मधुबनी, मुजफ्फरपुर, शिवहर आ सीतामढ़ी लेल मेघ गर्जन, वज्रपात, हवा संग मध्यम सं भारी बरखाक ऑरेंज अलर्ट जारी केलक अछि। विभागक दिस सं खराब मौसिम कें लए सतर्कता संबंधी चेतावनी सेहो जारी कएल गेल अछि।
विभाग कहलनि जे राज्य मे खराब मौसिम कें देखैत लोक सभ सावधानी बरतथि। कोनो आपातकालीन सहायता लेल विभागीय हेल्पलाइन नंबर 0612-2294204/205 आ आपातकालीन सहायता नंबर 1070 पर संपर्क कएल जा सकैत अछि।
बरखाक दौरान पेड़क नीचा शरण नहि लिअ। पानि मे अथवा खुलल खेत आ उंच स्थान पर नहि रहू। बिजलीक खंभा आ तारक लग जाए सं बचू।
उत्तर-मध्य, उत्तर-पूर्व आ दक्षिण-मध्य भागक जिलाक कतेको स्थान पर मेघ गर्जन आ वज्रपातक संग 30-40 किलोमीटर प्रति घंटाक गति सं तेज हवा चलबाक अनुमान अछि।
आगामी 2-3 दिनक दौरान राज्यक कतेको स्थान पर अधिकतम तापमान मे 1 सं 2 डिग्री सेल्सियस धरि गिरावट होयबाक संभावना अछि। आगामी पांच दिनक दौरान न्यूनतम तापमान मे कोनो विशेष परिवर्तनक संभावना नहि अछि।
एकरा संगहि मौसिम विभाग चेतावनी देलक अछि जे भारी बरखाक कारण नीचला इलाका मे जलजमाव भए सकैत अछि। तें जलभराव आ अनचोके बाढ़ि आबय बला क्षेत्र सं दूर रहबाक सलाह देल गेल अछि।
वज्रपात आ मेघ गर्जनक समय अपन सुरक्षा लेल पक्का मकानक भीतर शरण लिअ आ पेड़ आ बिजलीक खंभा सं दूरी बना कए राखू।
