दानापुर मे पूर्णिया सांसद पप्पू यादव परिजन सभ सं भेंट केलाह
2 करोड़ मुआवजा देबाक मांग
दानापुर। डेहरी-डालमियानगर नगर परिषदक कार्यपालक पदाधिकारी (ईओ) विमल कुमारक हत्या प्रकरणक बाद पूर्णिया सांसद पप्पू यादव मंगल भोर दानापुरक गोला रोड टी-प्वाइंट स्थित गंगा कुटीर अपार्टमेंट पहुंचलाह। ओ मृतकक परिजन सभ सं भेट कए शोक संवेदना व्यक्त कएलनि आ मृतकक पत्नी कें न्याय दिलाबएक भरोसा देलनि।
पप्पू यादव एहि हत्याकांडक जांच सीबीआई सं कराबएक मांग कएलनि। संगहि मृतकक आश्रित सभ कें 2 करोड़ मुआवजा देबाक आ मृतकक पत्नी कें सरकारी नौकरी मे क्लर्क पद पर नियुक्ति देबाक मांग सेहो राखलनि।
ड्राइवरक नारकोटिक जांच कराबयक मांग
सांसद गिरफ्तार ड्राइवरक नारकोटिक जांच कराबएक आ घटनास्थल पर घटना समय कतेक मोबाइल सक्रिय छल, एकर विस्तृत जांच कराबएक मांग कएलनि। प्रशासन द्वारा ड्राइवर कें हत्यारा बताओल जाए पर प्रश्न उठबैत ओ कहलनि जे गोली आ पिस्टल बिना एक व्यक्ति एतेक क्रूरतापूर्वक हत्या केना कए सकैत अछि। हुनकर अनुसार ई सुनियोजित हत्या प्रतीत होइत अछि।
सदन मे मुद्दा उठाबैक घोषणा
पप्पू यादव कहलनि जे मृतकक परिजन सभक कहब अछि जे ओ आब बिहार मे नहि रहए चाहैत छथि। ओ बिहार कें माफिया, अपराधी आ लुटेरा सभक गढ़ कहैत आरोप लगौलनि जे एतय आम नागरिक लेल सुरक्षित वातावरण नहि अछि।
ओ कहलनि जे जखन स्थानीय विधायक एहि मुद्दा पर पहिने सं आवाज उठौने छलाह, तखन सरकार आवश्यक कारबाइ किएक नहि कएलक। सांसदक अनुसार मृतकक पत्नी स्पष्ट रूप सं कहने छथि जे हुनक पति केर हत्या मात्र एक व्यक्ति नहि केने अछि।
पप्पू यादव आश्वासन देलनि जे ओ एहि मामिला कें संसद मे उठाएताह आ निष्पक्ष जांच सुनिश्चित कराबए लेल प्रयास करताह।
