श्रीलंका महिला क्रिकेट टीम विरुद्ध मंगल कें खेलल गेल तेसर टी20 मोकाबला मे पाकिस्तान 4 विकेट सं जीत दर्ज कएलक। शुरुआती दूनू मोकाबला हारि पहिने सं श्रृंखला गंमा चुकल पाकिस्तान लेल ई जीत आत्मविश्वास बढ़ेबला मानल जा रहल अछि। श्रीलंका 2-1 सं श्रृंखला अपन नाम कएलक।
रंगिरी दांबुला इंटरनेशनल स्टेडियम मे खेलल गेल मोकाबला मे पाकिस्तान टॉस जीतिकए पहिने गेंदबाजी करबाक निर्णय लेलक। पहिने बल्लेबाजी करैत श्रीलंका 6 विकेट पर 113 रन बना सकल।
श्रीलंकाक दिस सं कप्तान चमारी अथापथु सर्वाधिक 34 रन बनौलनि। 33 गेंदक पारी मे ओ 5 चौका लगौलनि। एकरा अतिरिक्त संजाना काविंदी 20 रन आ इमेशा दुलानी 17 रनक योगदान देलनि।
पाकिस्तानक दिस सं मोमिमा रियासत 2 विकेट लेलीह। उ मे हानी, नशरा संधू, तुबा हसन आ आएशा जफर सभ 1-1 विकेट प्राप्त कएलनि।
114 रनक लक्ष्यक पीछा करैत पाकिस्तान 18.2 ओवर मे 6 विकेट गमाकए जीत हासिल कएलक। पाकिस्तानक दिस सं चारिम स्थान पर बल्लेबाजी करए आएल आएशा जफर सर्वाधिक 39 रन बनौलनि। 31 गेंदक पारी मे ओ 6 चौका लगौलनि। कप्तान मुनीबा अली 19 रन, शावल जुल्फिकार 21 रन आ सायरा जबीन नाबाद 12 रन बनौलनि।
श्रीलंकाक गेंदबाजी मे कप्तान चमारी अथापथु 4 ओवर मे 20 रन दए 2 विकेट लेलीह। कविशा दिल्हाड़ी सेहो 4 ओवर मे 24 रन दए 2 विकेट प्राप्त कएलनि। निमाशा मीपागे कें 1 विकेट भेटल।
पाकिस्तानक आएशा जफर कें 39 रनक मैच जिताबए बला पारी आ 1 विकेट लेल प्लेयर ऑफ द मैच चुनल गेल। जखनकि श्रृंखला मे कुल 123 रन बनेनिहार श्रीलंकाक इमेशा दुलानी कें प्लेयर ऑफ द सीरीज घोषित कएल गेल।
श्रीलंका पहिल आ दोसर टी20 मोकाबला 6-6 विकेट सं जीतिकए तीन मैचक टी20 श्रृंखला 2-1 सं अपन नाम कएलक।
