बिस्फी, समदिया
बिस्फी प्रखंड क्षेत्रक उच्च माध्यमिक विद्यालय परसौनी उत्तरी आ मध्य विद्यालय परसौनीक परिसर मे शनिदिन शिक्षक-अभिभावक संगोष्ठीक आयोजन कयल गेल। संगोष्ठीक अध्यक्षता विद्यालयक प्रधानाध्यापक राजेश कुमार झा कयलनि। बच्चा सभक समुचित आ सर्वांगीण विकासक उद्देश्य सं एहि बैसारक आयोजन कयल गेल छल। एहि अवसर पर बिहारक गौरवशाली संस्कृति, परंपरा आ पर्व-त्योहारक महत्व पर विशेष चर्चा कयल गेल। संगोष्ठी मे बच्चा सभक शैक्षणिक प्रगति, नियमित उपस्थिति, अनुशासन, व्यवहार आ व्यक्तित्व विकास सं जुड़ल विभिन्न पहलू पर सेहो विचार-विमर्श कयल गेल। प्रधानाध्यापक राजेश कुमार झा बिहारक सांस्कृतिक विरासत आ गौरवशाली लोक परंपरा सभ सं बच्चा सभ कें अवगत करौलनि। ओ छठि पूजा, दीपावली, दुर्गा पूजा आ सामा-चकेवा सन प्रमुख पर्व-त्योहारक महत्व पर विस्तार सं प्रकाश देलनि। विद्यार्थि सभ कें एहि पर्व सभ सं जुड़ल आस्था, लोक संस्कृति, पारिवारिक एकता, सामाजिक सद्भाव, प्रेम आ भायचारा के संदेश सं परिचित कराओल गेल। विशेष रूप सं सामा-चकेवा पर्वक चर्चा करैत मिथिलांचलक एहि विशिष्ट लोक परंपरा कें क्षेत्रीय संस्कृतिक पहचान आ धरोहरक रूप मे प्रस्तुत कयल गेल।
एहि अवसर पर विद्यानंद सिंह, प्रदीप रंजन झा, पंकज कुमार, अभिलाष श्रीवास्तव, सुशांत कुमार झा, शोभा कुमारी, रेणु देवी सहित अन्य लोक उपस्थित छलाह।
