- शंकर चौक आ डीबी रोड मे छापामारी, चारि दोकानदारक लग नहि छल वैध लाइसेंस
-
एकटाक लाइसेंस सेहो नहि भेल छल नवीकृत
सहरसा, समदिया
सहरसा शहरक घनी आबादी बला रिहाइशी इलाका मे पटाखाक कारोबार आ भंडारण लोकसभक सुरक्षा लेल चिंता बढ़ा देने अछि। दीपावली आ छठ पर्वक मद्देनजर जिला प्रशासन द्वारा कयल गेल जांच आ छापेमारी मे पटाखा कारोबारक गंभीर अनियमितता सामने आयल अछि। शंकर चौक आ डीबी रोड स्थित पांच दोकानदारक विरुद्ध प्राथमिकी दर्ज करबाक आदेश देल गेल अछि। अंचल अधिकारी कहरा निरंजन कुमार मिश्रा सदर थानाध्यक्षके देल आवेदन मे कहलनि जे अनुमंडल पदाधिकारी सदरक निर्देश पर 25 अक्टूबरके पुलिस बलक संग पटाखा दोकान सभ मे छापेमारी कयल गेल। एहि दौरान अमरजीत कुमार, सुशील कुमार, चंदन कुमार, सूरज कुमार आ भारती देवीक दोकानक जांच कयल गेल। जांच मे अमरजीत कुमारक लाइसेंस नवीकृत नहि भेटल। जखन कि सुशील कुमार, चंदन कुमार, सूरज कुमार आ भारती देवी वैध लाइसेंस अथवा संबंधित कागजात प्रस्तुत नहि क सकलाह। ओतहि रंजय कुमारक लाइसेंस वैध भेटल, जे 2029 धरि नवीकृत अछि।
छापेमारीक दौरान पांचो दोकानदारक दोकान आ भंडारण स्थल सं विभिन्न प्रकारक पटाखा बरामद कयल गेल। स्वतंत्र गवाहक उपस्थिति मे जब्ती सूची तैयार क पटाखा जब्त कयल गेल। संपूर्ण कारबाइक मोबाइल सं वीडियोग्राफी सेहो कराओल गेल। अनुमंडल पदाधिकारीक निर्देश पर पांचू दोकानदारक विरुद्ध संबंधित धारा मे प्राथमिकी दर्ज करबाक अनुशंसा कयल गेल अछि।
आबादीबला क्षेत्र मे भंडारण सं दुर्घटनाक खतरा
शहरक व्यस्त आ घनी आबादी बला शंकर चौक क्षेत्र मे पटाखाक भंडारण सं आगि अथवा विस्फोट सन पैघ दुर्घटनाक आशंका बनल रहैत अछि। सवाल उठैत अछि जे जखन एहि इलाका मे वर्षो भरि पटाखाक कारोबार चलैत अछि तं नियमित जांच किएक नहि होइत अछि? मात्र दीपावली आ छठक समय प्रशासनिक सक्रियता बढ़ेनाइ पर्याप्त नहि अछि।
स्थायी निगरानी जरूरी
पटाखाक कारोबार मे लाइसेंस आ सुरक्षा मानकक पालन सुनिश्चित करब प्रशासनक जिम्मेदारी अछि। मात्र छापेमारी आ जब्ती सं समस्या समाप्त नहि होयत। जरूरी अछि जे रिहाइशी इलाका मे अवैध भंडारण पर रोक लगाओल जाय आ प्रशासन, अग्निशमन विभाग तथा संबंधित अधिकारी नियमित निरीक्षण करथि। समय रहैत निगरानी व्यवस्था मजबूत कयल गेल तं संभावित अगिलग्गी आ विस्फोट सन दुर्घटना सं बचाव संभव अछि।
