- अस्पताल मे इलाजक दौरान चारू तोड़लक दम
पटना, समदिय
पटना जिलाक बाढ़ि प्रखंड मे विषाक्त शराब पीला सं चारि गोटेक मृत्यु भए गेल अछि। ग्रामीण सभक अनुसार रविदिन करीब 10-11 बजे चारू युवक दारू पिबि रहल छलाह। दारू पिलाक किछुए देर बाद चारूक मुंह सं फेन निकलय लागल। स्वास्थ्य बेसी बिगड़ैत देखि ग्रामीण सभ चारू कें अस्पताल पहुंचौलनि। प्राथमिक उपचारक बाद चिकित्सक चारू कें पटना स्थित एनएमसीएच पठा देलनि। एनएमसीएच मे इलाजक क्रम मे चारू गोटेक मृत्यु भए गेल। मृतकक पहिचान बेढ़ना गाम निवासी शशि कुमार (32), विकास राम (40), पंकज सिंह (45) आ निशु कुमार (30)क रूप मे भेल अछि।
घटना शही थाना क्षेत्रक बेढ़ना गामक अछि। घटनास्थल सं दारूक बोतल, खाली ट्रेट्रा पैक आ किछु खेबाक सामान सेहो भेटल अछि। परिजनक अनुसार दारू पिलाक बाद चारू लोकक स्वास्थ्य अनचोके बिगड़य लागल। सभक मुंह सं फेन निकलि रहल छल। हालति गंभीर भेलाक बाद परिजन आनन-फानन मे बाढ़िक एकटा निजी चिकित्सालय मे चारू कें भर्ती करौलनि। तकर बाद हुनका सभ कें बाढ़िक अनुमंडलीय अस्पताल लए जायल गेल।
चारूक गंभीर अवस्था कें देखैत अनुमंडलीय अस्पताल सं सभ कें पटना स्थित एनएमसीएच रेफर कए देल गेल। एनएमसीएच मे भर्ती भेलाक किछुए घंटाक भीतर एक-एक कए चारू गोटेक मृत्यु भए गेल। ग्रामीण एसपी कुंदन कुमार कहलनि जे घटनाक जानकारी भेटिते पुलिस घटनास्थल पर पहुंचि गेल। पुलिस कें घटनास्थल सं दारूक बोतल आ प्लास्टिकक गिलास मे बनाओल गेल पैग भेटल अछि। चारू शवक पोस्टमार्टम कराओल जा रहल अछि। पोस्टमार्टम रिपोर्ट अयलाक बाद आगांक कारबाइ कएल जाएत।
ओतहि अनुमंडलीय अस्पतालक चिकित्सक श्रेया शेखर कहलनि जे पहिने तीन युवक कें अस्पताल आनल गेल छल, जिनका सभक मुंह सं फेन निकलि रहल छल। तकर बाद एकटा आओर युवक कें अस्पताल आनल गेल। प्राथमिक उपचारक बाद चारू कें पटना रेफर कए देल गेल, कारण सभक हालति गंभीर छल।
मृत्यु सं आक्रोशित ग्रामीण सभ सड़क जाम कएलनि
विषाक्त दारू पिला सं चारि गोटेक मृत्यु भेलाक खबरि पसरिते ग्रामीण सभ आक्रोशित भए गेलाह। आक्रोशित ग्रामीण सभ बख्तियारपुर–मोकामा फोरलेन सड़क जाम कए देलनि। ओ सभ प्रशासनक विरोध मे नारा लगा रहल छथि आ दोषी सभ पर कारबाइक मांग कए रहल छथि।
सड़क जामक सूचना भेटलाक बाद एसडीपीओ आ एसडीओ घटनास्थल पर पहुंचि गेलाह। अधिकारी सभ मृतकक परिजन आ आक्रोशित ग्रामीण सभ सं बात कए जाम हटेबाक प्रयास मे जुटल छथि। मुदा ग्रामीण सभ उचित कारबाइक मांग पर अड़ल रहलाह।
