नई दिल्ली, 1 सितंबर । भारतीय क्रिकेट कंट्रोल बोर्ड (बीसीसीआई) अफगानिस्तानक विरुद्ध तीन मैचक टी-20 सीरीज लेल मंगलदिन 15 सदस्यीय भारतीय टीमक घोषणा कएलक। श्रेयस अय्यर टीमक कप्तानी करताह, जखनकि तिलक वर्मा कें उपकप्तान बनाओल गेल अछि। 15 वर्षीय वैभव सूर्यवंशी एक बेर फेर भारतीय टी-20 टीमक हिस्सा बनल छथि। पिछला मौका पर ओ अपन प्रदर्शन सं प्रभावित केने छलाह।
टीम मे नितीश कुमार रेड्डी, वाशिंगटन सुंदर, जसप्रीत बुमराह आ हर्षित राणा कें फिटनेसक आधार पर शामिल कएल गेल अछि। मुदा मध्यक्रमक विस्फोटक बल्लेबाज रिंकू सिंह कें टीम मे जगह नहि भेटल अछि।
टीम मे अभिषेक शर्मा, वैभव सूर्यवंशी, शिवम दुबे, अर्शदीप सिंह आ वरुण चक्रवर्ती जेहन नियमित खेलाड़ी शामिल छथि। हर्षित राणाक सेहो टीम मे वापसी भेल अछि। जुलाई मे जिंबाब्वे मे खेलल गेल टीमक तुलना मे एहि बेर कतेको बदलाव कएल गेल अछि। जिंबाब्वे टी-20 सीरीज मे नहि चुनल गेल संजू सैमसनक सेहो टीम मे वापसी भेल अछि।
नियमित तेज गेंदबाज सभक वापसी सं गेंदबाजी विभाग मे सेहो बदलाव भेल अछि। अर्शदीप सिंहक संग जसप्रीत बुमराह आ हर्षित राणा कें शामिल कएल गेल अछि। प्रिंस यादव, यश ठाकुर, अशोक शर्मा आ मयंक यादव, जे सभ जिंबाब्वे दौरा पर गेल टीमक हिस्सा छलाह, एहि बेर टीम मे जगह नहि बना सकलाह। हार्दिक पांड्या कें सेहो टीम मे शामिल नहि कएल गेल अछि।
भारत आ अफगानिस्तानक बीच 13 सितंबर कें टी-20 सीरीजक पहिल मैच खेलल जायत। एकर बाद 15 सितंबर कें दोसर आ 17 सितंबर कें तेसर तथा आखरी मैच खेलल जायत। तीनू मैच दिल्लीक अरुण जेटली स्टेडियम मे आयोजित होयत।
वैभव सूर्यवंशीनक प्रदर्शन पर नजरि
वैभव सूर्यवंशी हालहि मे दलीप ट्रॉफी 2026 मे शानदार प्रदर्शन केने छथि। सेमीफाइनल मैच मे ईस्ट जोनक लेल खेलैत सेंट्रल जोनक विरुद्ध ओ 92 आ 40 रनक पारी खेललनि।
वैभव इंग्लैंड दौरा पर सीनियर टीम लेल अंतरराष्ट्रीय पदार्पण केने छलाह। इंग्लैंडक विरुद्ध तीन मैच मे ओ क्रमशः 14, 13 आ 15 रन बना सकलाह। मुदा तकर बाद जिंबाब्वे दौरा पर वैभव 50, 20 आ 81 रनक पारी खेललनि आ ‘प्लेयर ऑफ द सीरीज’क पुरस्कार जीतलनि।
अफगानिस्तानक विरुद्ध भारतक टीम
श्रेयस अय्यर (कप्तान), अभिषेक शर्मा, वैभव सूर्यवंशी, संजू सैमसन (विकेटकीपर), ईशान किशन (विकेटकीपर), तिलक वर्मा (उपकप्तान), शिवम दुबे, नितीश कुमार रेड्डी, अक्षर पटेल, वाशिंगटन सुंदर, वरुण चक्रवर्ती, रवि बिश्नोई, जसप्रीत बुमराह, अर्शदीप सिंह आ हर्षित राणा।
