आईआरसीटीसी मनी लॉन्ड्रिंग मामिला: लालू परिवारक विरुद्ध आरोप तय करबाक फैसला टरल, 30 सितंबर कें आदेश
्र
पटना/नई दिल्ली। दिल्लीक राउज एवेन्यू कोर्ट कथित आईआरसीटीसी होटल घोटाला सं जुड़ल मनी लॉन्ड्रिंग मामिला मे राजद सुप्रीमो लालू यादव, हुनकर परिवारक सदस्य आ अन्य आरोपितक विरुद्ध आरोप तय करबाक फैसला फिलहाल टारि देलक अछि। प्रवर्तन निदेशालय मामिला मे लालू यादव, पूर्व मुख्यमंत्री राबड़ी देवी, बिहार विधानसभा मे नेता प्रतिपक्ष तेजस्वी यादव, तेज प्रताप यादव, मीसा भारती, हेमा यादव सहित अन्य आरोपितक विरुद्ध आरोपपत्र दाखिल केने अछि।
30 सितंबर कें लालू परिवार पर फैसला
ई मामिला कथित आईआरसीटीसी होटल घोटाला सं जुड़ल अछि, जाहिक जांच पहिने केंद्रीय जांच ब्यूरो शुरू केने छल। आरोप अछि जे लालू यादवक 2004 सं 2009 धरि रेल मंत्री रहबाक दौरान आईआरसीटीसीक होटल सभक संचालन आ रखरखावक ठेका देबय मे अनियमितता भेल। आब अदालत एहि मामिला मे फैसला सुनयबाक लेल 30 सितंबरक तारीख तय केलक अछि।
आईआरसीटीसी मनी लॉन्ड्रिंग मामिला मे शनिदिन टरल फैसला
ईडीक कहब अछि जे निर्धारित नियम आ प्रक्रिया केर पालन नहि कए एकटा निजी कंपनी कें होटल रखरखावक ठेका देल गेल। जांच एजेंसीक अनुसार, एकर बदला मे करीब तीन एकड़ बहुमूल्य जमीन कथित रूप सं एकटा बेनामी कंपनीक माध्यम सं हासिल कएल गेल, जाहिक संबंध लालू यादवक परिवार आ करीबी सहयोगी सभ सं बताओल जा रहल अछि।
ईडी लालू यादव सहित 16 आरोपितक विरुद्ध दाखिल केलक आरोपपत्र
ईडी एहि मामिला मे कुल 16 आरोपितक विरुद्ध अभियोजन शिकायत दाखिल केने अछि। एहि मे लालू प्रसाद यादव, राबड़ी देवी, तेजस्वी यादव, तेज प्रताप यादव, मीसा भारती आ हेमा यादव सहित अन्य लोक शामिल छथि।
उल्लेखनीय अछि जे पछिला वर्ष अक्टूबर मे राउज एवेन्यू कोर्ट एहि कथित घोटाला सं जुड़ल भ्रष्टाचार मामिला मे आरोपित सभक विरुद्ध धोखाधड़ी, आपराधिक साजिश आ भ्रष्टाचार सं संबंधित धाराक अंतर्गत आरोप तय केने छल। सभ आरोपित अदालत मे अपनाके निर्दोष बतौने छलाह।
दिल्ली हाईकोर्ट मे लालू यादवक याचिका लंबित
ओतहि लालू प्रसाद यादव, राबड़ी देवी आ तेजस्वी यादव ट्रायल कोर्टक आदेश कें दिल्ली हाईकोर्ट मे चुनौती सेहो देने छथि। हाईकोर्ट मे हुनकर याचिका एखन लंबित अछि।
लालू प्रसाद यादव आ हुनकर परिवारक दिस सं लगातार आरोप सभ कें खारिज कएल जाइत रहल अछि। हुनकर कहब अछि जे आईआरसीटीसी होटल परियोजना लेल निविदा प्रक्रिया पूर्ण रूप सं निष्पक्ष आ पारदर्शी छल आ हुनका विरुद्ध लगाओल गेल आरोप राजनीतिक रूप सं प्रेरित अछि।
