जमुई, समदिया
बिहारक जमुई मे छात्रा सं छेड़खानीक चर्चित मामिलाक आरोपी हरेराम यादव कें बुधदिन न्यायालय मे पेश करबाक समय एक अधिवक्ता थापड़ लगा देलनि। अधिवक्ता आकाश पांडे पुलिसक सुरक्षा मे आरोपी कें न्यायालय सं बाहर अनबाक समय ओकरा पर हाथ उठा देलनि। एहि घटनाक बाद किछु समय धरि अदालत परिसर मे उहापोहक स्थिति बनि गेल।
हरेराम यादव कें देखबाक लेल भोरहि सं जमुई न्यायालय परिसर मे लोकक भीड़ जुटल छल। बरखाक कारण पुलिस ओकरा दिनक बाद न्यायालय मे पेश कएलक। जमुई पुलिस पोक्सो मामिलाक विशेष न्यायाधीश महेश्वर दुबेक कोर्ट मे हरेराम यादव कें प्रस्तुत कएलक, जतय सं ओकरा न्यायिक हिरासत मे जेल पठा देल गेल। पुलिस ओकरा न्यायालय सं बाहर निकालि गाड़ीक दिस लए जा रहल छल, तखने अधिवक्ता आकाश पांडे ओकरा थापड़ जड़ि देलनि।
अधिवक्ता आकाश पांडे कहलनि जे आरोपी जेहन कृत्य कएलक अछि, ताहि लेल जमुईवासी लज्जित छथि। हुनकर कहब छल जे अधिवक्ता होयबा सं पहिने ओ एकटा मनुष्य छथि आ हुनका भीतर मानवता अछि। जं एहि लेल हुनका कानूनक अनुसार सजा भेटैत अछि तं ओ ताहि लेल तैयार छथि। हुनकर कहब छल जे बहिन-बेटीक संग एहन घटना होयत तं ओकरा बर्दाश्त नहि कएल जायत।
5 आरोपी पकड़ल गेल
जमुईक मड़वा मे नाबालिग लड़का-लड़की कें रोकि ओकरा सं अभद्रता करबाक चर्चित मामिला मे हरेराम यादव सहित 2 आरोपी कें गिरफ्तार कएल गेल अछि। एहि मामिला मे 3 नाबालिग आरोपी कें सेहो पकड़ल गेल अछि। मामिला मे कुल 6 लोकक नाम सामने आएल अछि, जाहि मे 5 कें पकड़ल जा चुकल अछि, जखन कि एक आरोपी एखन धरि फरार अछि। पुलिस एहि मामिला मे कठोर कारबाइ करबाक बात कहि रहल अछि। एहि क्रम मे मंगलदिन एक आरोपी नंदन यादवक पैर मे गोली लागल छल। पुलिसक कारबाइ कें लोक हाफ एनकाउंटर कहि रहल छथि।
वीडियो वायरल करबाक मामिला मे सेहो कारबाइ
जमुई थाना कांड संख्या 428/2026 मे नाबालिग लड़का-लड़कीक वीडियो वायरल कए ओकर पहिचान सार्वजनिक करबाक मामिला मे जमुई साइबर थाना कांड संख्या 45/26 दर्ज कएल गेल अछि। पुलिस त्वरित कारबाइ करैत सोशल मीडिया हैंडलर औरैया पैरा, मटिहाना, सोनो निवासी योगेंद्र प्रसाद यादव, अडसार, जमुई निवासी फैयाज शाह आ सगमा, चंद्रदीप निवासी रामाशीष कुमार कें गिरफ्तार कए जेल पठा देलक।
पुलिसक अनुसार, इंस्टाग्राम, फेसबुक आ एक्स सहित विभिन्न सोशल मीडिया हैंडल पर वीडियो वायरल कएनिहार सैकड़ो लोकक लिंकक आधार पर खोजबीन चलि रहल अछि। एहि मामिला मे आइटी एक्टक विभिन्न धारा सं संग पोक्सो एक्टक अंतर्गत सेहो मुकदमा दर्ज कएल गेल अछि।
