पटना। केंद्रीय मंत्री आ हिंदुस्तानी आवाम मोर्चा (एचएम) केर संरक्षक जीतनराम मांझीक तबीयत फेर बिगड़ला पर बृहस्पति कें आगांक इलाज लेल हुनका दिल्ली लए जाओल गेल। बिहारक पूर्व मुख्यमंत्री मांझी कें हालहि मे तबीयत खराब भेला पर पटना स्थित मेदांता अस्पताल मे भर्ती कराओल गेल छल। हालांकि, हुनकर हालत मे सुधार भेला पर बुधदिन अस्पताल सं छुट्टी दए देल गेल छल। खबरक अनुसार, बुधदिन राति फेर हुनका बोखार आबि गेल।
चिकित्सकीय सलाहक बाद आगांक जांच आ उपचार लेल हुनका दिल्ली लए जेबाक निर्णय लेल गेल। यात्रा दौरान परिवारक सदस्य हुनका संग छलाह।
केंद्रीय मंत्री मांझीक दिल्ली मे कतेको मेडिकल जांच होयबाक संभावना अछि। हुनकर स्वास्थ्य संबंधी समस्या फेर उभरबाक सटीक कारण एखन धरि स्पष्ट नहि भेल अछि।
परिवारक सदस्य आ पार्टीक नेता जांचक परिणाम आ डॉक्टर सभ सं भेटयवला आगांक जानकारीक प्रतीक्षा मे छथि। मांझीक स्वास्थ्य खराब होयबाक खबर सं बिहारक राजनीतिक नेता आ समर्थक सभ मे चिंता पैदा भेल अछि।
मांझी हालक सप्ताह सभ मे राजनीतिक रूप सं सक्रिय रहल छथि। खास कए आरक्षणक मुद्दा आ अनुसूचित जाति कोटाक भीतर उप-वर्गीकरणक मांग कें लए ओ लगातार अपन पक्ष रखैत रहल छथि। हुनकर एहि रुख कें लए केंद्रीय मंत्री चिराग पासवानक संग सार्वजनिक रूप सं विचारक आदान-प्रदान सेहो भेल अछि।
चिराग पासवान वर्तमान आरक्षण व्यवस्था मे कोनो तरहक समीक्षा केर विरोध कएलनि अछि। ओतहि मांझी आ एचएम आरक्षणक लाभ ओहि समुदाय धरि सुनिश्चित करबाक लेल उप-वर्गीकरणक समर्थन कए रहल अछि, जे सभ सं बेसी वंचित मानल जाइत अछि।
मांझी 2024 मे सुप्रीम कोर्ट द्वारा देल गेल फैसलाक उल्लेख केने छथि। एहि फैसला मे कहल गेल छल जे राज्य संवैधानिक आवश्यकता केर अधीन रहैत अनुसूचित जाति कोटाक भीतर उप-वर्गीकरण कए सकैत अछि।
ओ तर्क देने छथि जे एहि फैसला सं राज्य सभ कें ई जांच करबाक आधार भेटैत अछि जे आरक्षणक लाभ अनुसूचित जाति समुदायाक सभ वर्ग धरि समान रूप सं पहुंचि रहल अछि अथवा नहि।
मांझी ईहो तर्क देने छथि जे किछु समुदाय कें ऐतिहासिक रूप सं आरक्षणक लाभक असमान हिस्सा भेटैत रहल अछि, जखनकि आर्थिक आ शैक्षणिक रूप सं वंचित समूहक प्रतिनिधित्व कम रहल अछि।
पंजाबक उदाहरण दैत मांझी दावा केने छथि जे उप-वर्गीकरणक परिणामस्वरूप विभिन्न समुदाय बीच आरक्षणक लाभक पुनर्वितरण भेल अछि।
