- नेपालक पानि आ बिहारक बजट पर भेल चर्चा
पटना, समदिया
मुख्यमंत्री सम्राट चौधरी शुक्रदिन केंद्रीय वित्त मंत्री निर्मला सीतारमण आ विदेश मंत्री एस. जयशंकर सं भेंट कएलनि। एहि दौरान नेपाल सं आबयबला पानि, बिहारक बजट आ पर्यटन विकास सहित कतेको महत्वपूर्ण मुद्दा पर चर्चा भेल। बैठक मे भारत-नेपाल जल आ बांध परियोजना पर सेहो विस्तार सं विचार-विमर्श कएल गेल। उपमुख्यमंत्री विजय चौधरी आ जनता दल यूनाइटेड (जेडीयू)क राज्यसभा सांसद संजय झा सेहो बैठक मे उपस्थित छलाह। मुख्यमंत्री सम्राट चौधरी बृहस्पति सांझ पटना सं दिल्ली पहुंचल छलाह। शुक्रदिन भोर मे ओ केंद्र सरकारक मंत्री निर्मला सीतारमण आ एस. जयशंकर संग महत्वपूर्ण बैठक मे शामिल भेलाह।
मुख्यमंत्री सोशल मीडिया पर जानकारी दैत कहलनि जे बिहारक विकास, राज्यक समृद्धि आ जनहित सं जुड़ल विषय सभ कें ओ केंद्र सरकारक समक्ष मजबूती सं रखलनि। हुनकर अनुसार बैठक अत्यंत महत्वपूर्ण रहल आ केंद्र आ राज्य सरकार आपसी समन्वय सं आगू बढ़बाक दिशा मे काज कए रहल अछि।
कोसी-मेची लिंक परियोजना पर जोर
बिहार सरकार नेपाल सं आबयबला नदीक बाढ़ि रोकबाक लेल जल प्रबंधन आ किसान सभ कें सिंचाइक पानि उपलब्ध करेबाक परियोजना पर विशेष जोर दए रहल अछि। केंद्र सरकार प्रधानमंत्री कृषि सिंचाई योजनाक अंतर्गत कोसी-मेची अंतरराज्यीय नदी लिंक परियोजना लेल केंद्रीय सहायता कें हालहि मे मंजूरी देने अछि। मुख्यमंत्री सम्राट चौधरी सेहो बीतल बुधदिन सुपौल जिलाक छातापुर प्रखंडक चैनपुर गाम मे निर्माणाधीन कोसी-मेची नदी लिंक परियोजनाक निरीक्षण केने छलाह। ओ अधिकारी सभ कें गुणवत्ता कायम रखैत निर्धारित समयसीमा मे निर्माण कार्य पूरा करबाक निर्देश देने छलाह।
