सहरसा : थाना क्षेत्रक सोनवर्षाराज-बैजनाथपुर मुख्य मार्ग पर सहमौरा गाम लग राम मंदिरक समीप बृहस्पतिक भोर तेज रफ्तार बाइक अनियंत्रित भए सड़कक कात मे लागल बिजलीक पोल सं जा टकरायल। एहि दुर्घटना मे बाइक सवार युवकक घटनास्थले परे मृत्यु भए गेल। मृतकक पहिचान शाहपुर पंचायतक वार्ड संख्या 10 निवासी विद्यानंद पोद्दारक 25 वर्षीय पुत्र श्याम पोद्दारक रूप मे भेल अछि।
भेटल जानकारीक अनुसार श्याम पोद्दार बाइक सं सोनवर्षाराज सं अपन घर शाहपुर जा रहल छलाह। एहि बीच सहमौरा गामक लग राम मंदिरक समीप अनचोके बाइक अनियंत्रित भए गेल आ सड़कक कात मे लागल बिजलीक पोल सं जा टकरायल। टक्कर एतेक जोरदार छल जे युवक गंभीर रूप सं घायल भए गेल। लगपासक लोक घटनास्थल पर पहुंचि कए कोनो सहायता करितथि, ताहि सं पहिने हुनकर प्राण चलि गेल।
युवकक मृत्युक खबरि भेटिते परिजन मे कोहराम मचि गेल। पत्नी गुड़िया कुमारी सहित परिवारक आन सदस्य लोकनिक हाल कानि-कानि कए बेहाल भेल अछि। घटनाक बाद गाम आ लगपासक क्षेत्र मे सेहो शोकक वातावरण पसरि गेल अछि।
