- बिहार सरकार देलक सफाइ, चारि दिन मे दोसर बेर राज्यपाल सं भेंट केलनि मुख्यमंत्री सम्राट चौधरी
पटना, समदिया
बिहार मे स्टूडेंट क्रेडिट कार्ड योजना सं उच्च शिक्षा लेल विद्यार्थीक चारि लाख रुपैया धरि ऋण भेटैत रहत। मुख्यमंत्री सम्राट चौधरी सोशल मीडिया एक्स पर कहलनि जे स्टूडेंट क्रेडिट कार्ड योजनाक संबंध मे विद्यार्थी आ अभिभावकक मोन मे कोनो तरहक संशय नहि रहबाक चाही। मुख्यमंत्री कहलनि जे उच्च शिक्षा लेल चारि लाख रुपैया धरि स्टूडेंट क्रेडिट कार्डक सुविधा भेटि रहल अछि आ आगू सेहो ई सुविधा पहिने जकां जारी रहत। बिहार सरकार युवाक शिक्षा आ हुनकर उज्ज्वल भविष्य लेल पूर्ण रूप सं प्रतिबद्ध अछि। शिक्षाक बाट मे आर्थिक संसाधन कें कखनो बाधक नहि बनय देल जाएत। एहि घोषणाक बीच मुख्यमंत्री सम्राट चौधरी आइ राज्यपाल सं भेंट कएलनि। चारि दिनक भीतर राज्यपाल सं मुख्यमंत्रीक ई दोसर भेंट अछि।
चारि दिन पहिने राशि दू लाख करबाक बात आयल छल
चारि दिन पहिने नीतीश कुमारक सात निश्चय योजनाक अंतर्गत शुरू भेल स्टूडेंट क्रेडिट कार्ड योजना मे सरकार द्वारा बदलावक बात सामने आएल छल। एहि मे कहल गेल छल जे आब विद्यार्थीक चारि लाखक बदला मात्र दू लाख रुपैया धरि ऋण भेटत। सरकारक एहि निर्णय पर नेता प्रतिपक्ष तेजस्वी यादव सवाल उठौने छलाह। ओ सोशल मीडिया एक्स पर कहलनि जे सरकारक खजाना खाली अछि आ बिहार पर भारी कर्जक बोझ चिंताक विषय अछि। खर्चक अनुपात मे राज्यक अपन राजस्व प्राप्ति सेहो पर्याप्त नहि अछि।
सरकार कहलक, राशि घटाओल नहि गेल
विवाद बढ़लाक बाद बिहार सरकार एहि संबंध मे सफाइ दैत कहलक जे शिक्षा ऋणक राशि घटाओल गेल अछि, ई बात सही नहि अछि। पहिने चारि लाख रुपैया बिहार राज्य शिक्षा वित्त निगमक माध्यम सं उपलब्ध कराओल जाइत छल। आब दू लाख रुपैया शिक्षा वित्त निगमक माध्यम सं देल जाएत, जखन कि बचल दू लाख रुपैया बैंकक माध्यम सं उपलब्ध कराओल जाएत। सरकारक अनुसार, बिहार स्टूडेंट क्रेडिट कार्ड योजनाक अंतर्गत विद्यार्थीक उच्च शिक्षा लेल उपलब्ध वित्तीय सहायता कम नहि कएल गेल अछि, बल्कि ओकर दायरा आओर विस्तृत कएल गेल अछि।
उच्च शिक्षा विभागक सचिवक अनुसार आब दू लाख रुपैया धरि शिक्षा ऋण बिहार राज्य शिक्षा वित्त निगमक माध्यम सं उपलब्ध होयत। दू लाख सं चारि लाख रुपैया धरि अतिरिक्त वित्तीय सहायता बैंक सभक माध्यम सं देल जाएत। पहिने चारि लाख रुपैया धरि पूरा राशि बिहार राज्य शिक्षा वित्त निगमक माध्यम सं उपलब्ध कराओल जाइत छल।
