मुख्यमंत्री केलनि घोषणा
शिक्षक नियुक्ति बढ़त
पटना। संत रविदासक 650म जयंतीक अवसर पर पटना स्थित ज्ञान भवन मे ‘समरसता संकल्प अभियान’ कार्यक्रमक आयोजन कएल गेल। एहि कार्यक्रम मे मुख्यमंत्री सम्राट चौधरी, भाजपा प्रदेश अध्यक्ष संजय सरावगी, मंत्री राम कृपाल यादव, दिलीप जायसवाल सहित कतेको मंत्री, विधायक आ पार्टी पदाधिकारी उपस्थित छलाह।
एहि अवसर पर मुख्यमंत्री शिक्षा, उच्च शिक्षा, धार्मिक-सांस्कृतिक विरासत आ सामाजिक समरसता कें लए कतेको महत्वपूर्ण घोषणा कएलनि।
सम्राट चौधरी कहलनि जे बिहार मे पहिनेसं 211 नव डिग्री कॉलेज खोलल जा चुकल अछि आ आब 400 सं बेसी नव डिग्री कॉलेज स्थापित कएल जाएत। ओ ईहो घोषणा कएलनि जे रामधारी सिंह दिनकरक नाम पर साहित्य विश्वविद्यालयक स्थापना कएल जाएत। भागलपुर मे डॉ. श्यामा प्रसाद मुखर्जीक नाम पर कृत्रिम बुद्धिमत्ता (एआई) विश्वविद्यालय खोलल जाएत।
मुख्यमंत्री कहलनि जे नालंदा विश्वविद्यालयक बाद आब विक्रमशिला विश्वविद्यालयक ऐतिहासिक गरिमा कें फेर सं जमीनि पर उतारबाक दिश मे काज कएल जाएत।
10 अगस्त सं शिक्षक नियुक्ति प्रक्रिया मे आयत तेजी
मुख्यमंत्री जानकारी देलनि जे प्रधानमंत्रीक प्रेरणा सं संत रविदासक जन्मस्थली सं आनल गेल पवित्र माटि कें बिहारक पंचायतसभ, मठसभ, मंदिरसभ आ अन्य धार्मिक स्थलसभ धरि पहुंचाओल जाएत, जाहिसं समाज मे समरसता आ एकताक संदेश जा सकए।
शिक्षा व्यवस्था मे सुधारक लक्ष्य तय करैत मुख्यमंत्री कहलनि जे आगामी दू वर्ष मे एहन स्थिति बनेबाक प्रयास कएल जाएत जाहिमे मंत्री, विधायक आ जिलास्तरीय अधिकारीसभ सेहो अपन बच्चासभक नामांकन सरकारी मॉडल स्कूलसभ मे कराबथि। हुनकर अनुसार जखन एहन होयत तखन सरकार अपन उद्देश्य मे सफल मानल जाएत।
मुख्यमंत्री कहलनि जे राज्य सरकार स्टूडेंट क्रेडिट कार्ड योजनाक अंतर्गत लगभग 18 हजार करोड़ रुपया खर्च कए रहल अछि, जाहिसं बिहारक विद्यार्थीसभ देशक अन्य राज्यसभ मे उच्च शिक्षा प्राप्त कए सकथि।
ओ समाज आ धार्मिक संस्थासभ सं अपील कएलनि जे राज्यक मठसभ आ मंदिरसभ अपन आसपासक स्कूलसभ आ कॉलेजसभ कें गोद लिअ। सरकार एहि काज मे हर संभव सहयोग देबाक लेल तैयार अछि। हुनकर अनुसार समाज आ सरकार मिलिकए शिक्षाक स्तर कें नव ऊंचाइ धरि पहुंचा सकैत अछि।
मुख्यमंत्री कांग्रेस पर निशाना साधैत कहलनि जे मंडल आयोगक रिपोर्ट कें लए कांग्रेस कखनो गंभीर चिंता नहि देखौने छल। ओ कहलनि जे देश मे मात्र आर्थिक रूप सं संपन्न वर्ग कें आरक्षण नहि भेटैत अछि, जखनकि अन्य सभ वर्ग कें संविधानक अनुरूप आरक्षणक लाभ भेटि रहल अछि।
हुनका अनुसार बिहार मे सवर्ण आबादी लगभग 15 प्रतिशत मानल जाइत अछि, जाहिमे करीब 5 प्रतिशत मुस्लिम समाजक लोकसभ सेहो शामिल छथि, जिनका सवर्ण आरक्षणक लाभ भेटैत अछि।
मुख्यमंत्री कहलनि जे राज्य सरकार विकासक संग-संग सांस्कृतिक पहचान कें सेहो महत्व दए रहल अछि। एहि क्रम मे पटना सं बक्सर धरि बनेबला मार्गक नाम विश्वामित्र पथ राखल जाएत। गंगाक पार बनेबला मार्गक नाम अंबिका पथ होएत। ओतहि गोपालगंज मे भगवान नारायणीक नाम पर सड़कक निर्माण कराओल जाएत।
