‘हर घर तिरंगा’ अभियान लेल जीविका दीदी तैयार करतीह 40 हजार तिरंगा
- प्रत्येक घर धरि राष्ट्रध्वज पहुंचेबाक लक्ष्य
सहरसा, समदिया
स्वतंत्रता दिवसक अवसर पर 9 सं 17 अगस्त 2026 धरि आयोजित होमए बला राष्ट्रव्यापी हर घर तिरंगा अभियान 2026 के सफल बनेबाक लेल जिला प्रशासन व्यापक तैयारी शुरू कए देने अछि। एहि वर्ष अभियान वंदे मातरम् के 150 वर्ष थीम पर आयोजित कएल जा रहल अछि। अभियानक उद्देश्य घर, कार्यालय आ सार्वजनिक स्थल पर राष्ट्रध्वज फहरा कए देशभक्ति, राष्ट्रीय गौरव आ जनभागीदारीक भावना मजबूत करब अछि। अभियानक अंतर्गत जिलाक जीविका दीदी सभ अपन हाथ सं करीब 40 हजार राष्ट्रध्वज तैयार कए रहल छथि। एहि तिरंगा सभ कें जिलाक विभिन्न प्रखंड आ नगर निकाय क्षेत्र मे आम लोक धरि पहुंचाओल जायत। एहि सं जतय राष्ट्रभक्तिक भावना बढ़त, ओतहि ग्रामीण महिला सभ कें रोजगार, आत्मनिर्भरता आ स्वरोजगारक अवसर सेहो भेटत। जिला पदाधिकारी दीपेश कुमारक निर्देश आ जीविकाक जिला परियोजना प्रबंधक श्लोक कुमारक मार्गदर्शन मे स्वयं सहायता समूह सं जुड़ल महिला सभ उत्साहक संग तिरंगा निर्माणक काज मे जुटल छथि। जिला परियोजना प्रबंधक कहलनि जे सभ प्रखंड आ नगर निकाय क्षेत्र मे पर्याप्त संख्या मे राष्ट्रध्वज उपलब्ध करबाक व्यवस्था कएल जा रहल अछि। जीविका समूह द्वारा निर्मित तिरंगा घर, सरकारी आ निजी संस्थान, व्यावसायिक प्रतिष्ठान आ सार्वजनिक स्थल पर फहराबऽ लेल वितरित कएल जायत। ई पहल महिला सशक्तीकरण आ राष्ट्र निर्माणक समन्वयक एकटा प्रेरणादायक उदाहरण बनि रहल अछि।
