पटना । बिहारक भागलपुर जिलामे बाढ़िक स्थिति लगातार चिंताजनक होइत जा रहल अछि। कोसी नदीक तेज दबाव आ भारी बरखाक बीच दू अलग-अलग जगह पर तटबंध टूटि गेल अछि। नौगछियाक रंगरा चौक प्रखंडक बनिया गाममे पुरान रेलवे लाइनक तटबंधक करीब 15 मीटर हिस्सा कोसीक बाढ़िक पानिक दबावमे ढहि गेल। टूटल हिस्सा सं पानि तेजी सं आसपासक इलाका दिस बहि रहल अछि, जाहि सं साधोपुर, मसुदनपुर, बैसी, भवानीपुर आ बनियाक लोकमे डर बढ़ि गेल अछि। स्थानीय प्रशासन आ लोक स्थिति पर लगातार नजरि रखने अछि, कारण बाढ़िक पानि आसपासक इलाकापर दबाव बना रहल अछि। दोसर घटना नौगछियाक गोपालपुरमे भेल, जतय ब्रह्मोत्तर तटबंधमे करीब 10 मीटरक कटाव भेल अछि। अधिकारीक अनुसार, बृहस्पति देर राति अन्हरि आ बरखा के बाद ई हिस्सा टूटि गेल।
प्रशासन आ स्थानीय लोकनि मिलि कए स्थिति कें काबूमे करबाक आ आगू नोकसान रोकबाक लेल कारबाइ तेज कए देने छथि। एहि तटबंध कें लए पहिनेसं चिंता छल, कारण चारि दिन पहिने एतय रिसाव देखल गेल छल। 10 मीटरक हिस्सा ढहि गेलाक बाद आब आशंका अछि जे पैघ कटाव भेल तं गोपालपुरक पैघ आबादी प्रभावित भए सकैत अछि।
लगातार बाढ़ि कें कारण बड़ी संख्या मे परिवारकें अपन घर छोड़ि कए राहति शिविरमे जाए पड़ल अछि। एखन प्रभावित इलाकामे 27,954 लोक राहति शिविरमे रहि रहल छथि।
आपदा प्रबंधन विभागक प्रधान सचिव संतोष कुमार मल्ल कहलनि जे जे परिवार पिछला पांच दिन सं बाढ़ि कें कारण फंसल छथि, हुनका 7,000 रुपैयाक आर्थिक मदद देल जाएत। ई राशि हुनकर बैंक खातामे सीधा पठाओल जाएत। ई मदद दीर्घ समय सं विस्थापन झेलि रहल परिवारकें तत्काल सहारा देबाक लेल अछि।
बाढ़ि सं शिक्षा व्यवस्था सेहो अस्त-व्यस्त भए गेल अछि। कोसी क्षेत्रक करीब 5,000 स्कूलमे पानि भरि गेल अछि, जाहि सं हजारो छात्रक पढ़ाइ प्रभावित भए रहल अछि। कतेको जगह पर स्कूलक भवनकें राहति आ बचाव कार्यमे उपयोग कएल जा रहल अछि, जाहि सं पढ़ाइ आर बेसी बाधित भए गेल अछि।
सुपौलमे कोसी नदीक जलस्तर फिलहाल स्थिर बताओल जा रहल अछि। शुक्र भोर 6 बजे कोसी बराज सं करीब 1.41 लाख क्यूसेक पानि छोड़ल गेल, जखनकि बराह क्षेत्र सं 1.07 लाख क्यूसेक पानि छोड़ल गेल।
जलस्तर स्थिर रहला परो अधिकारी नदीक जलस्तर आ दबाव पर लगातार नजरि रखने छथि। भागलपुरमे ताजा तटबंध टूटला आ बिहारक पैघ हिस्सामे एखनहु बाढ़िक स्थिति बनल रहला सं प्रशासन आ स्थानीय लोक आगूक दिनमे स्थिति आर बिगड़बाक आशंका कें लए सतर्क छथि।
