मधुबनी, समदिया
मिथिलाक प्रसिद्ध पर्व कोजागराक अवसर पर जयनगरक दुल्लीपट्टी मे न्यायाधीश नीलेश भारद्वाज आ भारत सरकारक भविष्य निधि विभाग मे पदस्थापित निखिल भारद्वाजक सम्मान मे कवि गोष्ठीक आयोजन कयल गेल। कार्यक्रम मे मैथिली आ हिंदी साहित्य सं जुड़ल कवि सभ अपन रचनाक माध्यम सं मिथिलाक संस्कृति, परंपरा आ साहित्यिक विरासत कें जीवंत कयलनि। कवि सभक प्रस्तुति पर श्रोता खूब आनंदित भेलाह। कवि गोष्ठीक अध्यक्षता प्रो. वंशीधर मिश्र कयलनि, जखनकि मंच संचालन अजीत आजाद कयलनि। कार्यक्रमक शुभारंभ समस्तीपुरक जिला जज समीर कुमार झा, विधान परिषद सदस्य घनश्याम ठाकुर आ बिहार सरकारक पूर्व मंत्री रामप्रीत पासवान संयुक्त रूप सं कयलनि। एहि अवसर पर कवि कमलेश प्रवेंद्र, झोली पासवान, प्रो. शिव कुमार झा, नारायण यादव, ऋजन कश्यप आ आदया कुमारी अपन कविताक पाठ कयलनि। हुनकर रचना सभ श्रोता कें खूब गुदगुदेलनि आ साहित्यिक वातावरण कें जीवंत बना देलनि। मिथिलाक पारंपरिक रीति-रिवाजक अनुसार कार्यक्रम मे शामिल अतिथि आ कवि सभ कें सम्मानित कयल गेल। सम्मानित करय बला मे डॉ. वीरेंद्र झा, डॉ. प्रभात कुमार झा, शिक्षाविद् मनीष कुमार झा, प्रवीण कुमार झा, समाजसेवी वीरेंद्र यादव, डॉ. गौरव झा आ निशांत शामिल छलाह। कार्यक्रम मे भाकपा-मालेक प्रखंड सचिव भूषण सिंह, मुखिया महासंघ मधुबनीक जिलाध्यक्ष आ जनसुराज पार्टीक खजौली विधानसभा प्रत्याशी रूपम कुमारी, डॉ. परशुराम मिश्र, प्रभा झा, राम कृपाल यादव, रूणा कुमारी, विभा झा, अरुणा झा, पूर्व प्रमुख चंद्रमोहन सिंह, गौड़ी सिंह, प्रीति कुमारी, उमेश ठाकुर, बिपिन झा, अनिल पासवान, अमर झा आ मोनू ठाकुर सहित सैकड़ो साहित्यप्रेमी आ गणमान्य लोक उपस्थित छलाह। कोजागराक अवसर पर आयोजित एहि कवि गोष्ठी मिथिलाक सांस्कृतिक परंपरा, साहित्यिक समृद्धि आ आपसी सौहार्दक संदेश देलक।
